Për të kënaqur shijen, nepsin dhe oreksin dhe për të ngrohur organizmin gjithashtu.
Një recetë fantastike, tipike e kuzhinës shqiptare e përgatitur në të gjitha trevat dhe ideale sidomos për vaktet e drekës.
Qoftet janë padyshim një ndër gatimet e mrekullueshme të kuzhinës tradicionale shqiptare, të përgatitura në mënyra të ndryshme.
Por kur ato kombinohen në supa e gjellë, shija që të ofrojnë është fantastike.
Ka shumë mënyra në kombinimin e supave në gatimin e recetave të ndryshme, me salca të lehta kosi me hudhra, arrash apo domatesh, perimesh të ndryshme etj.
AgroWeb.org ju sugjeron më poshtë recetën e përgatitjes së qofteve të vogla me lëng të kthjellët dhe perime, një supë fantastike që me patjetër do të mbledhë gjithë familjen rreth tryezës së ngrënies.
Përgatitja e Supës me Qofte të Vogla
Përbërësit
(Sasia e përbërësve më poshtë është për 4-5 persona)
1 litër lëng i kthjellët (përgatitet me kocka mishi)
200 gr mish të girë
1 kokërr vezë
1 kokërr qepë
1 karrotë
1 patate
1 lugë gjelle gjalpë
kripë
piper
Përgatitja
Fillimisht përgatisim lëngun e kthjellët.
Kockat e mishit i vëmë në një tenxhere të madhe, i hedhim ujë dhe i ziejmë.
15 minuta nga fundi i procesit të zierjes shtojmë patatet dhe karrotat e prera në kubikë të vegjël.
Gjatë zierjes nga sipërfaqja heqim yndyrën që ka dalë sipër si edhe shkumën. Lëngun e gatshëm e kullojmë.
Më pas mishin e grirë e bashkojmë me qepët e grira, dhe e marinojmë me kripë e piper. Punohet brumi dhe ndahet në copa të vogla të rrumbullakta, sa një kokërr arrë.
Qoftet e përgatitura hidhen në një tavë të lyer me yndyrë, kaurdisen pak, u hidhet lëngu dhe stufohen derisa të jenë gati.
Para se t’i shërbejmë qoftet i ruajmë në lëng, gjatë shërbimit i vëmë në pjatë dhe i hedhim sipër lëngun e kthjellët të nxehtë.
Kjo supë shoqërohet në mënyrë fantastike me sallata të freskëta të stinës, bukë të thekur e djathra të ndryshëm, apo byrekë të përgatitur në shtëpi si dhe zahire të ndryshme siç janë të gjitha llojet e ndryshme të turshive etj.
