Drejtoria Rajonale e Trashëgimisë Kulturore Berat bëri të ditur se, në laboratorin e restaurimit të veprave të artit ka filluar puna për restaurimin e 2 ikonave të reja.
Njëra prej tyre është ikona “Shën Gjergji”, të cilës nuk i njihet autori. Ajo e ka prejardhjen nga kisha “Lindja e Shën Mërisë” në Vokopolë të Beratit. Ikona tjetër që po i nënshtrohet restaurimit është “Shën Gjergji dhe Shën Mitri”, me prejardhje nga kisha “Profet Ilia” në Berat, edhe kjo ikonë me autor anonim.
Ndërhyrjet konservuese dhe restaurimi do të bëjnë të mundur nxjerrjen në dritë të këtyre veprave të artit nga faza e degradimit, duke i dhënë mundësinë e ekspozimit në vijimësi të një procesi, që ka për vizion ruajtjen dhe promovimin e trashëgimisë kulturore, shkruan ATSH.
Këto ikona janë pjesë e fondit të DRTK Berat.
