Sindikata e Bashkuar e Arsimit, Shkencës dhe Teknologjisë ka njoftuar se më 1 maj do të organizojnë një protestë para ndërtesës së Qeverisë së Kosovës.
Krahas kësaj, kryetari i Sindikatës së Bashkuar të Arsimit, Rrahman Jashari, shpreson që pas kësaj proteste, Qeveria dhe Ministrja e Arsimit, Arbërie Nagavci, do ta lexojnë drejt mesazhin e tyre, kështu duke filluar edhe me dialogun.
“Uroj që pas 1 majit, Qeveria dhe Nagavci ta lexojnë drejt mesazhin dhe të fillojmë me dialogun, sepse kur ka takime marrëveshjet mund të arrihen, pasi të gjitha kërkesat tona janë legjitime dhe shumë lehtë realizohen. Në protestën e nesërme sa i takon SBASHK-ut, marrin pjesë vetëm udhëheqësit sindikal të të gjitha niveleve, gjegjësisht kryetarët dhe kryesitë e shoqatave sindikale që nga çerdhet deri në universitet. Do të kemi marshim nga oborri i bibliotekës ndërkombëtare drejt MASHT-it, pastaj drejt konvikteve, pastaj për t’u kthyer deri tek katedralja, e për t’u ndalur pastaj te Qeveria për t’i thënë kërkesat tona. Mesazh numër 1 është “Qeveri reflekto dhe realizo kërkesat tona”, kështu për të parandaluar veprimet tjera sindikale”, deklaroi Jashari në emisionin “Ditari”.
I pyetur se a kanë tentuar që para vendimit final për protestën, të kontaktojnë edhe njëherë me ministren apo dikë nga Qeveria, Jashari bëri të ditur se përveç se kanë dërguar të shkresa, më 22 prill kanë kërkuar edhe takim me Nagavcin, por që s’kanë marrë përgjigje.
“Po, ne kemi dërguar shkresën e radhës, kemi dërguar shkresa edhe në të kaluarën. Më 22 prill kemi kërkuar takim me ministren Nagavci, mirëpo në atë kohë s’kemi marrë përgjigje. Madje, për hir të korrektësisë i kemi dërguar edhe më 25 prill edhe informatën që do të mbahet protesta, i kemi treguar se kush do të marrë pjesë”, potencoi tutje Jashari në Tëvë1.
Sindikata e Bashkuar e Arsimit, Shkencës dhe Teknologjisë, ka njoftuar se në organizimin e protestës më 1 maj para Qeverisë, do të kërkojnë ngritjen e pagave, nënshkrimin e aneks Kontratës Kolektive të Arsimit dhe zbatimin e normave të mësimdhënies deri në 18 orë.
