Sulmi i fundit me raketa ruse në Odesë, ku pesë persona humbën jetën dhe 32 të tjerë u plagosën, thekson nevojën për ndihmë urgjente ushtarake për Ukrainën, sipas presidentit Zelensky, i cili bëri thirrje për dërgesa më të shpejta të armëve dhe të municioneve për të mbrojtur vendin nga ofensiva ruse në lindje
Një sulm me raketa ruse në qytetin port të Odesës në Detin e Zi ka shkaktuar vdekjen e pesë personave dhe plagosjen e 32 të tjerëve, kështu ka bërë të ditur guvernatori rajonal.
Ndërsa, presidenti ukrainas, Volodymyr Zelensky, ka bërë thirrje për dërgesa më të shpejta të armëve dhe të municioneve për trupat ukrainase, pasi, sipas tij, situata e tensionuar në lindje vazhdon të përkeqësohet.
Sulmi i cili ndodhi në mbrëmje vrau tri gra dhe një burrë, ka thënë guvernatori Oleh Kiper në Telegram.
Ai raportoi më vonë se një burrë tjetër vdiq nga një goditje që pësoi si pasojë e sulmit.
Guvernatori ka shtuar se nga 32 personat e lënduar, 25 janë në spital.
Në mes tyre janë 2 fëmijë, njëri 16 dhe tjetri 5 vjeç, si dhe një grua shtatzënë.
Fëmija 5-vjeçar është në gjendje jashtëzakonisht të rëndë, ka thënë ai, duke shtuar se gjashtë nga të rriturit janë në gjendje të rëndë.
Presidenti i SHBA-së, Joe Biden, nënshkroi një paketë ndihme ushtarake prej 61 miliardë dollarësh, por aleatët evropianë dhe SHBA-ja janë kritikuar për vonesat në furnizim.
Sekretari i përgjithshëm i NATO-s, Jens Stoltenberg, duke vizituar kryeqytetin ukrainas për herë të tretë që kur Rusia nisi pushtimin e saj në shkallë të plotë në shkurt të vitit 2022, pranoi se “vonesa serioze në mbështetje kanë sjellë pasoja serioze në fushën e betejës”, përcjell Dukagjini.
Komandanti i lartë ushtarak ukrainas ka raportuar për rritjen e aktivitetit rus në frontin lindor, duke përshkruar një përforcim të armikut dhe një ofensivë në disa drejtime, por pa arritur suksese operative të shquara.
