Eric Gordy, eksperti për Evropën Juglindore thotë se nuk ka dyshime që Bashkimi Evropian do të kërkojë formimin e Asociacionit të Komunave me shumicë serbe, si kusht për anëtarësim në KiE.
Gordy në një përgjigje dhënë për GazetaBlic thekson se, kjo ishte e dakorduar në marrëveshjet e arritura, ku në këto të fundit, vetëm forma që do të merrte Asociacioni nuk ishte rënë dakord.
“Nuk ka dyshim që BE-ja do të kërkojë që të formohet asociacioni i komunave. Nuk ka shumë shanse që të mos jetë kërkesë pasi që ishte rënë dakord me Marrëveshjen e Brukselit në vitin 2013. Ajo që nuk u dakordua në Bruksel, megjithatë, ishte forma që do të merrte asociacioni. Duket se ka pasur një supozim se palët do të punonin së bashku në mirëbesim për të zhvilluar interpretime të marrëveshjes që mund të zbatohej. Kjo është e qartë se nuk ka ndodhur, prandaj ne shohim gjendjen aktuale të tensionit të shtuar”, tha Gordy.
Tutje, ai thotë se Evropa po shkon drejt një interpretimi të marrëveshjes që favorizohet nga Serbia.
“Duket sikur Evropa po shkon drejt një interpretimi të marrëveshjes që favorizohet nga Serbia, e cila i sheh komunat në Asociacion si me një shkallë shumë të lartë të autonomisë nga Republika e Kosovës. Ky është një interpretim që asnjë qeveri në Kosovë nuk mund ta pranonte pa bërë ndryshime jopopullore në Kushtetutë”, tha Gordy,
Gordy thotë se, BE-ja po e favorizon Serbinë për shumë arsye, përfshirë këtu mos-pëlqimin që shumë liderë evropian kanë për kryeministrin Kurti.
“Pse BE-ja po e favorizon Serbinë në këtë pjesë? Një arsye mund të jetë se aktorët kryesorë besojnë se një nivel i lartë i autonomisë do të ndihmojë në zbutjen e krizës, por është shumë e vështirë të shihet pse dikush do ta besonte këtë duke pasur parasysh thellimin e tensionit të shkaktuar nga autonomia në të gjithë botën, përfshirë në Bosnje dhe Hercegovinë. Një arsye tjetër mund të jetë edhe se shumë liderë evropianë nuk e kanë pëlqyer zotin Kurti, duke e perceptuar atë si të paaftë për të bërë marrëveshje. Megjithatë, në këtë rast, edhe nëse z. Kurti do të zëvendësohej nga dikush tjetër diçka që u provua një herë nga Shtetet e Bashkuara kur Trump ishte në detyrë, ai person tjetër nuk do të ishte në gjendje të pranonte interpretimin e marrëveshjes që Evropa po promovon pa ndryshuar kushtetutën”, tha Gordy.
