Zëvendësministri i Administrimit të Pushtetit Lokal, Arbër Vokrri, tha se me votimin e djeshëm ka marrë fund çfarëdolloj arsyetimi për kërkimin e shkarkimit të kryetarëve në 4 komunat veriore të Kosovës.
Në emisionin “Ditari” në Tëvë1, Vokrri tha se qytetarët dje e patën këtë mundësi që përmes votimit të kërkojnë largimin e kryetare, por nuk e kanë bërë një gjë të tillë.
“Mendoj se po, me këtë që ndodhi dje, ka marr fund çfarëdolloj arsyetimi për të bërë shtypje ose edhe kërkesë të butë për largim të këtyre kryetarëve nga pozita që e mbajnë tani. Nuk ka ngelur ndonjë argument as për faktorin ndërkombëtar e as këdo tjetër për të bërë kërkesë që të shkohet kundër vullnetit qytetar sepse nëse qytetarët nuk dëshmuan vullnet për shkarkimin e kryetarëve, çfarëdo mase tjetër jashtë rregullave të ligjit që do t’i shkarkonte ata do të ishte në shpërputhje me vullnetin e qytetarëve”, tha Vokrri.
Ndërsa, sa i përket kthimit të objektet komunale të kryetarëve të Zubin Potokut dhe Zveçanit, Izmir Zeqiri dhe Ilir Peci, Vokrri tha se vetëm nevojiten disa renovime në zyrave dhe një gjë e tillë do të ndodh.
“Pajtueshmëria jonë ka qenë që pavarësisht kërkesave nga ambasadat dhe faktori ndërkombëtar, ata ta kryejnë detyrën e tyre zyrtare nga objekti që u takon, ta shfrytëzojnë objektin derisa ta kenë këtë pozitë. Natyrisht janë disa çështje të natyrës teknike dhe një gradualitet se si të bëhet kjo. Së pari kemi menduar që ia vlen të funksionalizohet objekti në Zubin Potok , një nga arsyet është se edhe qytetarët janë larg më të gatshëm që të bëhet kjo, më të interesuar që të bëhet një gjë e tillë dhe mandej me këtë do të kishim 3 komuna që funksionojnë në kushte normale dhe lehtë do të bëhej edhe e katërta, Zveçani. Mirëpo në Zubin Potok nevojitet që të bëhet një renovim i zyrave për arsye se është bërë një demolim i tyre për tu përshtatur rrethanave, disa dyer janë thyer, pajisjet janë dëmtuar, orenditë etj.”, deklaro Vokrri.
