Ministri i Administrimit të Pushtetit Lokal, Elbert Krasniqi i ka bërë thirrje qytetarëve të katër komunave veriore që të dalin të votojnë në referendumin që është duke u mbajtur për shkarkimin apo jo të 4 kryetarëve shqiptare.
Ai ka thënë se organizimi i këtij referendumi ka qenë detyrë e Qeverisë që të ofrojnë këtë mundësi për qytetarët që të shprehin vullnetin e tyre.
“Unë sot fillova me i vizitu disa prej hapësirave ku po organizohet votimi i pyetjes a duhet të largohet kryetari i komunës ose jo?…Udhëzimi administrative e ka hapur mundësinë që përmes peticionit, pastaj u parashtrua me 20 për qind të votuesve të një qyteti ku ata e kanë iniciuar këtë peticion. Sot juanë hap të gjitha në rregull dhe të shohim se si po shkon procesi. Qeveria e Kosovës e ka pasur detyrën dhe mandatin që qytetarët të kenë mundësi të shprehin pakënaqësinë ose kërkesën e tyre për largimin e kryetarit nga funksioni paraprakisht me një të drejtë që ju garantohet përmes Ligjit për Vetëqeverisje Lokale. Nëse në këtë votim marrin pjesë 50 për qind e qytetarëve +1 dhe ata votojnë për largimin e kryetarëve, pastaj presidentja e vendit do të shpallë zgjedhjet e parakohshme. Detyrë e jona ka qenë që të ofrojmë këtë mundësi për qytetarët që të shprehin vullnetin e tyre”, ka deklaruar ai.
Tutje, Krasniqi ka thënë se Lista Serbe dëshiron ta ketë monopolin mbi politikën serbe në Kosovë dhe se ata i shohin institucionet vetëm për vete dhe jo për qytetarët.
“ Lista Serbe dëshiron ta ketë monopolin mbi politikën serbe në Kosovë. Ata i shohin institucionet vetëm për vete dhe jo për qytetarët. Ata vazhdojnë që të i kenë ulsët e rezervuara në Kuvendin e Kosovës dhe të mos i përfaqësojnë interesat e qytetarëve, mirëpo të i marrin pagat e Kuvendit”, ka thënë ai.
Sot, (e diel) do të votohet për apo kundër largimit të katër kryetarëve shqiptarë në komunat veriore të Kosovës, përcjell Gazeta Blic.
Sipas udhëzimit administrativ që mundëson largimin e kryetarëve të komunave, të miratuar shtatorin e vitit të kaluar, që ky votim të jetë i suksesshëm, duhet 50 për qind, plus një votë e qytetarëve me të drejtë vote.
