Në mungesë kuorumi ka dështuar të bëhet konstituimi i Komisionit Hetimor Parlamentar për procesin e subvencionimit të teksteve e mjeteve shkollore për vitin shkollor 2023/2024.
Në komision ishin të pranishëm vetëm 5 deputetë, si Shemsedin Dreshaj nga radhët e AAK-së, Bekim Haxhiu nga radhët e PDK-së dhe nga radhët e VV-së ishin tre deputetë, Mefail Bajqinovci, Arjeta Fejza dhe Mirlinda Tishukaj Sadiku.
Deputeti i PDK-së, Bekim Haxhiu ka kërkuar që të vendoset më herët kur të mbahen mbledhjet pasi sipas tij disa deputetë po janë jashtë shtetit për shkak të angazhimeve tjera.
Ndërkaq deputeti i VV-së, Mefail Bajqinovci ka propozuar që të kenë takime çdo të premte në ora 13:30 dhe për këtë propozim pati dakordim nga deputetët e pranishëm.
Pas propozimeve të deputetëve, kryesuesi i këtij komisioni, Shemsedin Dreshaj e mbylli mbledhjen.
Ndryshe, më 4 prill, pas më shumë se tri orë diskutimesh, Kuvendi i Kosovës ka themeluar Komisionin hetimor parlamentar për procesin e subvencionimit të blerjes së teksteve shkollore dhe të mjeteve mësimore për vitin shkollor 2023/2024.
Themelimi i këtij komisioni ishte propozuar nga Partia Demokratike e Kosovës (PDK).
Para se të votohej themelimi i këtij komisioni, deputetët opozitarë dhe ata të partisë në pushtet zhvilluan debat të ashpër lidhur me ketë çështje.
Deputeti i Partisë Demokratike të Kosovës, Ardian Kastrati, akuzoi ministren e Arsimit, Arbërie Nagavci, për “krim të organizuar” në procesin e subvencionimit të teksteve shkollore.
“Ky skenar është i organizuar. Ka erë të madhe të korrupsionit që shkon në krim të organizuar. Fillohet- kinse ofertat janë shtrenjtë, doli kompania tha e keni 4% më lirë. Kur u bën 8 minuta para fillimit të vitit shkollor, dolët dhe improvizuat me një vendim që dëmtoi shkollën, fëmijët, nxënësit. Dhe, këto nuk ishin pasojat e vetme. E keni shkelur brutalisht Ligjin për ndarjet buxhetore”,ka thënë ai.
Të pranishëm në seancën e 4 prillit gjatë votimit ishin 82 deputetë, ndërsa në votim kishin marrë pjesë 61 prej tyre.
Nga 61 vota, 57 e mbështeten komisionin hetimor parlamentar dhe 4 ishin kundër.
“Kemi kuorum. Kuvendi e themelon Komisionin hetimor parlamentar” konstatoi kryetari i Kuvendit, Glauk Konjufca.
Procesi i sivjetmë i pajisjes së nxënësve me tekste shkollore ka hasur në kritika të shumta në shtator të vitit 2023.
Për dallim nga vitet e kaluar, prindërit është dashur që vetë t’i blejnë librat shkollorë për fëmijët e tyre.
Qeveria e Kosovës ka subvencionuar prindërit për blerjen e librave shkollorë, në shumën prej 80 eurosh për fëmijët nga klasa 1-5, për libra dhe mjeteve shkollore, ndërsa nga 30 euro për fëmijët nga klasa 6-9 për blerje të materialeve shkollore, përcjell Dukagjini.
Për të përfituar nga subvencionimi, prindërit është dashur të aplikojnë përmes platformës e- Kosova.
