Kryeministri Albin Kurti në një mbledhje të Lëvizjes Vetëvendosje ka folur për kërcënimet nga Serbia, ndërsa tregoi për investimet që janë bërë në ushtrinë e Kosovës, shkruan Reporteri.net.
Kurti tha se kur në Europë po zhvillohet një luftë, Serbia po kërcënon dhe se Kosova është përgjigjur duke e rritur buxhetin për ushtri dhe duke u armatosur e shtuar ushtarët.,
“Në kohën kur kemi luftë në Europë dhe kërcënime të sigurisë nga fqinji verior, jemi përgjigjur me dyfishim të buxhetit për ushtrinë dhe trefishim të buxhetit për armatim. Blemë dronët Bayraktar dhe prokuruam raketat anti-tank Javelin, ndërkaq në kazerma ka 1852 ushtarë më shumë, të cilëve do t’u bashkëngjiten sivjet edhe 600 rekrutë të rinj”, tha Kurti.
Kryeministri tutje tha se në veri të vendit është ulur ilegaliteti dhe është rritur ligjshmëria dhe siguria.
“Në veri të vendit janë mbyllur 27 rrugë ilegale, janë shkatërruar 9 lobarotre droge atje, 6 të kriptovalutave dhe 4 të depove të armatimit. Janë ngritur 9 stacione policore për mbikqyrjen dhe kontrollin e kufirit”, tha Kurti.
Ai përmendi edhe mos ngritjen e aktakuzës nga Prokuroria e shtetit të Kosovës kundër Milan Radojiçiq.
“Po hyjmë në javën e 30-të kur Radojiçiq i sanksionuar nga SHBA dhe Britani e Madhe, ende nuk ka aktakuzë nga Prokuroria e shtetit për sulmin terrorist që na vrau rreshterin, heroin, Afrim Bunjaku, në të cilin sulm pranoi pjesëmarrjen dhe autorësinë”, tha Kurti, përcjell Reporteri.net.
Ai tutje tha se Kosova është ngritur në indeksin e sundimit të ligjit sepse është luftuar kontrabanda, krimi dhe korrupsioni.
“Kemi sekuestruar 2.4 tonë subsatanca narkotike, janë mbyllur 35 rrugë ilegale, dhe 16 laboratore të droges janë shkatërruar”, tha ai.
