Ministrja e Drejtësisë, Albulena Haxhiu, ka reaguar pas vrasjes së Erona Coklit, 21-vjeçares, nga ish-bashkëshorti i saj në Ferizaj dje, në Qendrën për Punë Sociale, përcjell InLajmi.
Haxhiu tha se tentimet për të folur mbi motivet a shkaqet e akteve të tilla janë tendencë për relativizimin dhe justifikimin e krimit.
Secila vonesë minimale për drejtësi tregon për shtegdalje për një kompromis me kriminelët, theksoi ajo.
Sistemi gjyqësor dhe prokurorial me vendimet e tyre duhet të na dëshmojnë se anën e kujt e mbajnë. Është momenti i fundit që drejtësia të veprojë, nuk kemi jetë grash për të humbur, shtoi Haxhiu.
Ajo gjithashtu tha se si ministre, si aktiviste, si grua, si nënë, jam me secilën grua dhe vajzë që t’i dalim përballë këtyre kriminelëve që muaj pas muaji marrin jetë grash.
Postimi i plotë i saj:
Nuk ka asnjë justifikim për vrasjen e grave. Asnjë rrethanë lehtësuese. Tentimet për të folur mbi motivet a shkaqet e akteve të tilla janë tendencë për relativizimin dhe justifikimin e krimit. Vrasja është krim, vrasësi është kriminel. Vrasja e grave është puro femicid dhe duhet drejtësi një hap e më parë.
Secila vonesë minimale për drejtësi tregon për shtegdalje për një kompromis me kriminelët. Pra, tashmë kur gruaja është vrarë dhe nuk e kthen asnjë dënim çfarëdoqoftë ai, çdo vonesë eventuale është tashm krim në vetvete.
Jehonën e drejtësisë duhet ta ndjejë secila grua e Kosovës.
Sistemi gjyqësor dhe prokurorial me vendimet e tyre duhet të na dëshmojnë se anën e kujt e mbajnë. Është momenti i fundit që drejtësia të veprojë, nuk kemi jetë grash për të humbur. Njerëzimi ka shpikur gjyqësorin pikërisht që të dobëtit të kenë mundësi që të ketë drejtësi edhe për ta. Drejtësia nuk ka lindur vetvetiu, por pikërisht përkundër përvojës së njerëzimit me padrejtësinë.
Si ministre, si aktiviste, si grua, si nënë, jam me secilën grua dhe vajzë që t’i dalim përballë këtyre kriminelëve që muaj pas muaji marrin jetë grash./InLajmi/
