Në ditën e Fitër Bajramit, imami Bekim Jashari ka treguar më shumë për muajin e Ramazanit dhe ditën e Fitër Bajramit, duke u shprehur se tradita duhet ruajtur
Imami, Bekim Jashari, i ftuar në “FIVE”, ka folur më shumë për muajin e shenjtë të Ramazanit dhe Fitër Bajramin.
“Objektivi kyq i Islamit është devotshmëria, devotshmëria nënkupton mirësjellje, ripërtëritjen e objektivave për një rrugëtim të ardhshëm”, tha Jashari.
E muaji i Ramazanit, sipas Jasharit, është një muaj shpirtëror, që ngërthen elemente të rëndësishme dhe afrimitet me krijuesin e madhërishëm.
“Ramazani kërkon përpos largimit nga pija edhe kërkesën e ndërtimit shpirtëror në raport me njerëzit” tha Jashari.
Sipas Jasharit, Ramazani i largon të gjitha veset e këqija.
“Kurani e bën një besimtar të jetë i matur, i kujdesshëm, edhe në fjalë, vepër, punë e kudo që është”, u shpreh Jashari.
Për imamin çështja e besimit bëhet vetëm me vullnet.
“Ne në këtë botë kemi çështjen etnike, që është vullnet i krijuesit, ne kemi lindur në këtë etni, çështja e besimit është vullnet, çështja e etnisë nuk është vullnet, Zoti ne na ka krijuar shqiptarë,” tha ai.
Festat në të kaluarën me të tashmën dallojnë, por në esencë, sipas Jasharit, nuk është cenuar tradita.
Sipas Jasharit, megjithëse duhet respektuar feja, nuk duhet të ndryshohen traditat, përcjell Dukagjini.
“Ne nuk kemi nevojë që të tjetërsohemi, traditat e huaja janë tradita nuk janë fe, mendimet e huaja mbi Kuranin dhe Islamin mbeten mendime, dhe rruga është që studiuesit islam fetar shqiptar duhet të krijojnë një mendësi shqiptare të interpretimit islam”.
“Falënderimi i takon Zotit, luftës çlirimtare dhe popullit tonë heroik që ka dhënë kontribut të madh, pa atdhe nuk mund të bëjmë asgjë”, u shpreh Jashari.
