Miliona vetë në Meksikë, SHBA dhe në Kanada përjetuan mbrëmjen e 8 prillit dukurinë e rrallë të eklipsit të Diellit, ndonëse në disa zona ai u zbeh prej reve.
Eklipsi, spektakli qiellor, ndodh kur Hëna kalon midis Diellit dhe Tokës duke e mbuluar tërësisht Diellin.
Eklipsi nisi në Paqësor dhe hija kaloi mbi veriun e Meksikës, në SHBA nga Teksasi në drejtim të verilindjes deri në Maine, duke prekur edhe juglindjen e Kanadasë dhe përfundoi në Atlantikun verior. Në Meksikë mijëra turistë dhe banorë në qytetin bregdetar në Paqësor Mazatlán, ndoqën skeptaklin natyror, duke përjetuar se si për pak minuta në mesditë papritur u errësua.
Kur qielli u ndriçua sërish, njerëzit duartrokitën dhe derdhën lot, sikurse njoftoi televizioni lokal.
Milenio. Presidenti Andrés Manuel López Obrador kishte shkuar enkas në Mazatlán për të përjetuar këtë dukuri natyrore. Ai dha edhe konferencën e zakonshme për shtyp nga ky qytet.
Në SHBA miliona vetë ishin përgatitur prej muajsh për spektaklin kozmik duke planifikuar party të përbashkëta për vëzhgimin e dukurisë qiellore. Në zonën e eklipsit u përfshinë qytete të mëdha si Dallasi, Bufalo dhe Montreali, ku jetojnë gjithsej mbi 30 milionë banorë. Shumë shkolla qëndruan të mbyllura. Hotelet dhe shtëpitë e pushimit ishin të prenotuara prej kohësh dhe kishte dyndje në trafik. Në shumë zona spektakli u zbeh prej reve, megjithatë shumë njerëz ishin përgatitur me gjyslykë speciale për eklipsin.
Edhe shkencëtarët ishin përgatitur prej muajsh për këtë ngjarje. Autoriteti i SHBA-së për Fluturimet në Hapësirë, NASA, e hulumtoi eklipsin ndër të tjera edhe me avionë e ballonë.
Eklipsi i fundit në SHBA është parë në vitin 2017, në Meksisë më 1991 dhe në Kanada më 1979. Eklipsi tjetër në SHBA dhe Kanada parashikohet të kalojë në vitin 2044 dhe në Meksikë më 2052, shkruan DW.
Këtë herë eklipsi nuk mund të shihej nga Europa. Vetëm në disa skaje perendimore të kontinentit si në disa pjesë të Portugalisë, Spanjës, Irlandës dhe Britanisë së Madhe si dhe Islandës ishte njoftuar një eklips i pjesshëm. Në Gjermani mundi të shihej një eklips i plotë në gusht 1999. Ndërsa eklipsi tjetër do të jetë në shtator të vitit 2081.
