Ambasadori gjerman në Kosovë, Jorn Rohde në tubimin përkujtimor në 25-vjetorin e masakrës në Krushë të Madhe tha se kjo masakër dhe të tjerat treguan se kishte ardhur koha që NATO të ndërhynte për të shmangur spastrimin etnik që po ndodhte, shkruan Gazeta Online Reporteri.net.
Ambasadori Rohde tha se ky intervenim i NATO-s ishte i duhur dhe qëndrojnë edhe sot përkrah këtij vendimi.
Sipas tij ata që kanë kryer këto krime, e që siç tha Rohde disa prej tyre janë ende të lirë, duhet të japin llogari.
“Jam këtu për të përkujtuar për të gjitha viktimat të atij krimi të tmerrshëm të kryer nga forcat e Millosheviqit. Dhe gjithashtu për tju shprehur ngushëllime familjarëve të të gjitha viktimave. Kjo masakër dhe të tjerat, treguan se kishte ardhur koha që NATO-ja të ndërhynte për të shmangur atë tragjedi humanitare si dhe spastrimin etnik që po ndodhte këtu. Ky intervenim ishte i duhuri dhe qëndrojmë krah tij. Shumica e atyre që i kanë kryer këto krime janë ende në arrati dhe kjo nuk do të duhej që të lejohej, ata duhet që të japin llogari”, tha Rohde.
Tutje ai shpreson se Kosova shumë shpejt do t’i bashkohet familjes evropiane, shkruan Reporteri.
“Jam krenar të them që së bashku me aleatët dhe partnerët tanë mund të them që Gjermania ka ndihmuar që të ndërtojmë Kosovën në një shtet të lirë, demokratik dhe shumë etnik. Gjithashtu shpresoj që Kosova me fqinjët e saj së shpejti do ti bashkohet familjes evropiane, sa më shpejt të jetë e mundur”, tha ambasadori gjerman.
