Ministria e Financave, Punes dhe Transfereve ka njoftuar se pas miratimit nga komiteti për partneritet publiko privat, është nënshkruar amandamenti i marrëveshjes së koncesionimit për aeroportin ndërkombëtar të Prishtinës “Adem Jashari”, i cili parasheh kompenzimin e periudhës së pandemisë si forcë madhore, shkruan Inlajmi.
Bazuar në dispozitat e marrëveshjes bazë të koncesionimit, Komiteti për PPP ka njohur periudhën prej 20 muajsh si periudhë të pandemisë gjatë së cilës aeroporti ka operuar me ndërprerje apo me kufizime, dhe për të cilën periudhë marrëveshja bazë parasheh zgjatjen e afatit proporcionalisht në fund të periudhës së koncesionimit në rastet kur kemi të bëjmë me forcë madhore.
Për periudhën që parashihet të kompenzohet, tarifa e koncesionimit që përfiton Republika e Kosovës do të jetë 55%, gjë që paraqet rritje substanciale krahasuar me përqindjen e paraparë gjatë periudhës së pandemisë në vitet 2020 dhe 2021, e që ishte 34%, përkatësisht 37%.
Kjo gjë është reflektuar edhe në amandamentin e nënshkruar sot, i cili bën zbatimin e këtyre dispozitave të marrëveshjes bazë dhe kornizës ligjore në fuqi. /InLajmi/
