Kryetari i Aleancës Kosovare të Bizneseve, Agim Shahini, thotë se gjendja e bizneseve nuk është e mirë për shkak të krizave të shpeshta. Ai thotë se kosovarët janë bërë konsumatorë të produkteve të huaja për shkak të përqindjes së lartë të importeve.
Ai thotë se këtë vit ka rënë edhe fuqia blerëse dhe se kjo po shihet si brengë për shtetin.
Shqetësuese e sheh edhe mungesën e punëtorëve, teksa ka kritika edhe për mënyrën se si po adresohet kjo çështje nga institucionet.
“Bizneset e Kosovës janë në gjendje jo të mirë për shkak të krizave të njëpasnjëshme por edhe për shkak të rënies së fuqisë blerëse e cila ka rezultuar që këtë vit të kemi më pak konsumatorë dhe kjo është një breng për të gjithë qytetarët e vendit dhe vet shtetin e Kosovës duke u varfëruar çdo vit. Pothuajse në gjithë sektorët ka kërkesa të vazhdueshme për punëtoret por zakonisht bizneset kërkojnë punëtorë të lirë por nuk ka më punëtorë të mirë, ata janë punëtorë të cilët duhet të paguhen, aftësohen për tregun e punës dhe bashkërisht të kemi fuqi të punës më aktive e produktive duke i dhënë shtytje zhvillimit ekonomik të vendit”, thotë Shahini.
Shahini ka treguar edhe për ndikimin që kanë pasur luftërat në për botë në ekonominë vendëse.
“Luftërat të cilat po ndodhin në Ukrainë-Rusi, Palestinë-Izrael janë vende që po ndikojnë në mënyrë indirekte në Kosovë, sidomos lufta në Ukrainë ka ndikuar në çrregullimin e tregjeve globale dhe ato kanë pësuar rritje të çmimeve rënieve të produktivitetit dhe sanksionet që janë marrë në vendet tjera kanë ndikuar që të kenë mungesë të produkteve dhe shtrenjtim të tyre.
I pyetur rreth qasjes institucionale drejtuar bizneseve në vend, Shahini deklaroi se po mungon një “hallkë lidhëse” e cila po tërheq probleme tjera.
“Partneriteti mes sektorit privat dhe publik nuk është në nivelin e duhur, mungon një hallkë lidhëse mes sektorit privat dhe institucioneve qendrore, me qeverisje lokale kemi raporte mira e po ashtu edhe bizneset, por shumicën e rasteve dhe problemeve prodhohen nga qendra, nga institucionet qendrore dhe bizneset kanë probleme të njëpasnjëshme, me zvarritje të licencave, leje të punës, ndryshimet ekonomike ato fiskale, dhe këto probleme besoj se do të filloj të mendon për sektorin privat më mirë dhe të jetë nxitës i zhvillimit ekonomik të prodhimit vendor e po ashtu edhe investimeve të huaja”.
Shahini i ka quajtur qytetarët e Kosovës si konsumatorë të produkteve të huaja. Thotë se importet aktualisht janë 90%, shkruan EO.
“Qeveria ka fuqi të nxit zhvillim në vend, nxit prodhimtari vendore, stimuloj këtë formë që të kem më pak importe. Aktualisht importet e Kosovës janë rreth 90% e ky trend nuk po zbritet dhe neve na mbetet të jemi konsumatorë të produkteve të huaja. Kosova brenda vitit të kaluar ka importuar mbi 5.7 miliardë euro produkte të ndryshme dhe këto produkte janë në konsum të qytetarëve të vendit, mendoni sikur këto të ishin në qarkullim të brendshëm dhe sa do fuqizohej ekonomia e vendit prandaj strategjia e zhvillimit ekonomik për bizneset dhe ekonominë e brendshme mungon, ashtu sikur ligji për tregti të brendshme”, thotë ai.
