Kryeministri Albin Kurti në një intervistë është pyetur nëse Qeveria e tij do të shkruaj një draft -statut për Asociacionin siç kanë deklaruar disa here disa bashkëpunëtorë të tij. Javën që shkoi diplomati amerikan Gabriel Escobar tha se ka vend për një draft të ri por sipas tij qeveria duhet të nxitojë. Kurti nuk është deklaruar deri më tani për mundësinë e propozimit, por sot ka dhënë indikacione nëpërmjet një metafore me kafe – se nëse ndërkombëtarët kërkojnë që Kosova ta bëjë Asociacionin atëherë kjo nuk do të bëhet sipas propozimit evropian por do të jetë një “kafe” tjetër.
Kryeministri i Kosovës, Albin Kurti, në një intervistë për Radion Evropa e Lirë ka folur edhe për Draft-Statutin e Asociacionit të Komunave me Shumicë Serbe të propozuar nga Bashkimi Evropian.
Kurti ka thënë e ajo që s’duhet të ndodh është nxjerrja e Draftit të Asociacionit nga paketa, meqë në atë mënyrë sipas tij, do t’i kryhej shërbim Serbisë.
Kurti duke folur për modalitetin e implementimit, ka thënë se Asociacioni, s’mund të jetë jashtë pakos së Marrëveshjes Bazike apo të kërkohet implementimi para saj.
“Mua më është thënë që marrëveshjen duhet ta bëj me Serbinë. Për këtë jam angazhuar. Asnjëherë nuk më është thënë se marrëveshjen duhet ta bëj me ndërkombëtarët. Nëse faktorët ndërkombëtarë i vënë sanksione Serbisë dhe e shpallin – le të themi – shtet rebel, i cili ka dalë prej sistemit të marrëdhënieve normale ndërkombëtare, atëherë ne do të mund të diskutonim me ndërkombëtarët se çfarë sugjerimi kanë për vendin tonë.
Mirëpo, mua po më thuhet që marrëveshjen duhet ta bëjmë me Beogradin zyrtar dhe unë po angazhohem për këtë. Por, ajo që nuk duhet ta bëjë askush, është që draft-statutin e Asociacionit ta nxjerrë nga paketa, sepse në atë mënyrë i bëhet shërbim Serbisë.”
Neni 7 i Marrëveshjes Bazike flet për vetëmenaxhimin e komunitetit serb. Neni 10 flet për të gjitha marrëveshjet që i kemi trashëguar. Pra, Asociacioni nuk mund të jetë jashtë ose para Marrëveshjes Bazike”, ka thënë Kurti.
Tutje në këtë intervistë, Kurti ka thënë se ua ka bërë të qartë presidentit të Serbisë dhe ndërmjetësve ndërkombëtarë, se s’mund t’iu japë kafe pa filxhan, dhe sipas Kurtit, Kosova është filxhani ku duhet të rrijë Asociacioni.
Shefi i ekzekutivit ka thënë se ka besuar se kafenë po e kërkon presidenti i Serbisë, por shton se nëse kafenë po e kërkojnë ndërkombëtarët, atëherë s’mund të jetë e njëjta.
“Unë i kam thënë edhe presidentit të Serbisë, edhe ndërmjetësve ndërkombëtarë: nuk mund t’ju jap kafe pa filxhan. Atyre që duan kafe pa filxhan, ua tregoj filxhanin e zbrazët. Filxhani është Republika e Kosovës, ku do të rrijë ai Asociacion. Unë kam besuar se kafenë po e kërkon presidenti i Serbisë. Nëse kafenë po e kërkojnë ndërkombëtarët, atëherë kjo është një kafe tjetër, nuk mund të jetë kafeja e njëjtë”, ka thënë Kurti.
