Nol Nushi nga Partia Socialdemokrate (PSD) ka thënë se “taktizimet” e kryeministrit të Kosovës, Albin Kurti gjatë gjithë mandatit të tij i kanë bërë “dëm” Kosovës në arenën ndërkombëtare.
Në emisionin “FIVE”, Nushi ka thënë se është e disata herë që qeveria e Kosovës demantohet nga ndërkombëtarët kështu duke përmendur deklaratën e emisarit amerikan, Gabriel Escobar se kushti për anëtarësim në KiE nuk është vetëm ai i Manastirit të Deçanit siç u theksua nga Kurti, por edhe Asociacioni dhe çështja e disa shpronësimeve në veri të Kosovës.
“Për herë të disatë, qeveria del në gënjeshtër. Edhe kësaj radhe doli duke thënë se Manastiri është kushti i vetëm për anëtarësim në Këshill të Evropës. Pastaj me ato shprehje boshe që thotë se kemi mospajtime të vogla me ShBA, Escobari e tha qartë se ka mungesë komunikimi, ka bllokadë në komunikim. Taktizimet e Kurtit gjatë gjithë mandatit të tij i kanë bërë keq Kosovës në arenën ndërkombëtare, por Kurtin e kanë mbajtur lartë në elektorat”, ka thënë Nushi.
Ndryshe, 2 kushte i janë vendosur Kosovës për t’u anëtarësuar në Këshillin e Evropës, sipas të dërguarit të posaçëm të Shteteve të Bashkuara të Amerikës për Ballkanin Perëndimor, Gabriel Escobar.
Në një intervistë për Radio Evropa e Lirë (REL), Escobar e ka përshëndetur vendimin për tokat e Manastirit të Deçanit, por ka theksuar se një nga kushtet vijuese për anëtarësim në KiE është themelimi i Asociacionit të Komunave me shumicë serbe.
Përveç Asociacionit, kusht tjetër për anëtarësim, sipas Escobar, është çështja e disa shpronësimeve në veri të Kosovës, shkruan Dukagjini.
Më 13 mars, kryeministri i Kosovës, Albin Kurti, njoftoi gjatë mbledhjes së ekzekutivit më se kërkesa drejtuar Agjencisë Kadastrale është bërë pasi që zbatimi i vendimit të Gjykatës Kushtetuese, që kërkon transferimin e 24 hektarëve tokë të Manastiri i Deçanit, do të ishte vendimtar për aplikimin e Kosovës për anëtarësim në Këshillin e Evropës, gjatë Asamblesë Parlamentare të këtij institucioni, që do të mbahet në prill.
