Trajneri i Atletico Madridit, Diego Simeone është shumë i lumtur që skuadra e tij ka kaluar në çerekfinale pas fitores ndaj Interit me penallti.
Atletico arriti ta zhvlerësoj humbjen 1-0 në ndeshjen e parë ndaj Interit, pasi në shtëpi fitoi me rezultat 2-1, ndërsa ishin më të saktë në penallti duke siguruar kalimin në çerekfinale.
Kjo fitore e ka gëzuar jashtë mase trajnerin argjentinas, Simeone, i cili ka përgëzuar lojtarët e tij për paraqitjen dhe tifozët gjithashtu për mbështetjen.
“Jam i lumtur për lojtarët, për njerëzit. Pas lojës së keqe në Cadiz thashë se nuk mund të kërkonim asgjë, duhej të jepnim në vend që të kërkonim dhe sot djelmoshat ishin shumë të mrekullueshëm. Më bën shumë të lumtur mua dhe gjithë të tjerët”, ka thënë fillimisht Simeone pas ndeshjes.
“Është emocionuese, jam mirënjohës për gjithçka që po më ndodh në Atletico. Ne vazhdojmë të duam të përmirësohemi, njerëzit tanë na shoqërojnë, lojtarët përfundojnë duke reaguar përtej nevojës për të përmirësuar disa gjëra, por ka diçka që shkon përtej iluzionit. Të gjithë duhet të jemi bashkë dhe kjo energji u ndje”, shkruan Telegrafi.
“Interi janë shumë të mirë, ata luajnë në mënyrë të pabesueshme. Ata kanë lojtarë shumë të mirë. Sot Axel, Savic dhe Mario luajtën shumë mirë, një lojë të shkëlqyer. Ne eliminuam një nga më të mirët në Evropë dhe loja ishte emocionuese”, përfundoi trajneri i Atleticos.
