Prishtina ka reaguar fuqishëm pas humbjes që e pësoi vikendin e shkuar në udhëtim te Drita.
Të enjten, Prishtina triumfoi thellë ndaj skuadrës së Dukagjinit në ndeshjen e luajtur në stadiumin “Sami Kelmendi” në Lipjan.
Dueli që i takoi xhiros së 25-t të Superligës së Kosovës në futboll, përfundoi me fitoren 5:0 të Prishtinës.
Me këtë fitore, Prishtina forcohet në pozitën e 5-të në tabelë me 37 pikë, gjashtë më shumë se Dukagjini që është një vend më poshtë dhe regjistroi humbjen e 3-të në 4 ndeshjet e fundit. Në fakt, Prishtina i dha fund dilemës së fituesit qysh në pjesën e parë kur realizoi 3 gola.
Qysh në minutën e 2-të, rezultati i ndeshjes u zhbllokua me golin e mbrojtësit Ardian Limani. 3 minuta më vonë, Prishtina e dyfishoi epërsinë me anë të kapitenit Mërgim Pefqeli. Pefqeli e shënoi edhe golin e 3-të për Prishtinën dhe të 2-tin personal në minutën e 42-të nga penalltia.
Pas 3 golave në pjesën e parë, Prishtina shënoi edhe 2 gola të tjerë në pjesën e 2-të për ta konfirmuar fitoren e thellë. Rezultatin në 4:0 e ngriti mesfushori Genc Hamiti që realizoi me kokë në minutën e 59-të, përpara se i njëjti futbollist ta vulos triumfin e Prishtinës në mintën e 80-të.
Ndërkohë, të enjten fitore të rëndësishme ka shënuar edhe skuadra e Dritës që po lufton për titullin e kampionit.
Drita triumfoi 1:0 në udhëtim te Feronikeli ’74 për të ngushtuar edhe më shumë diferencën e pikëve me 2 skuadrat e para në tabelë.
Golin e fitores për Dritën e shënoi Raddy Ovouka në minutën e 79-të, shkruan Tëvë1.
Me këtë fitore, Drita mbetet e 3-ta në tabelë por ngrihet në kuotën e 49 pikëve, një më pak se Llapi që është i 2-ti në tabelë dhe 2 më pak se Ballkani që mbetet lider edhe pas kësaj xhiroje.
