Ministri i Punëve të Brendshme Xhelal Sveçla, ka uruar 8 Marsin duke thënë se sot dhe çdo ditë nuk do të reshtim së punuari për barazi e drejtësi, mirëqenie e siguri, përcjell InLajmi.
Sveçla tha se 8 Marsi është data që na e përkujton përpjekjen e pareshtur për barazi e drejtësi, është thirrje për bashkëveprim të pandalshëm që çdo vajzë e çdo grua të jetojë me dinjtet, e barabartë, e sigurtë dhe e mbrojtur.
Ai u shpreh se si ministër, jo vetëm sot por çdo ditë, po punojmë që secila grua të jetojë e veprojë e sigurtë në vendin tonë ashtu që edhe secili vrasës mizor i vajzave e grave të sillet me shpejtësi para drejtësisë e të marrë dënimin e merituar.
Ministri tutje shtoi se në këtë ditë shpreh mirënjohjen më të thellë për secilën vajzë e secilën grua që ka thyer çdo barrierë para saj, duke thënë se para vetes kemi shumë sfida të cilat bashkëpunimi e bashkëveprimi si institucione e si shoqëri i tejkalon.
Postimi i plotë i tij:
8 Marsi është data që na e përkujton përpjekjen e pareshtur për barazi e drejtësi. 8 Marsi është thirrje për bashkëveprim të pandalshëm që çdo vajzë e çdo grua të jetojë me dinjtet, e barabartë, e sigurtë dhe e mbrojtur.
Rezistenca dhe kontributi i vajzave dhe grave në historinë e popullit tonë mbetet shembulli më i mirë që secili prej nesh kemi para vetes.
Si Ministri e Punëve të Brendshme, jo vetëm sot por çdo ditë, po punojmë që secila grua të jetojë e veprojë e sigurtë në vendin tonë ashtu që edhe secili vrasës mizor i vajzave e grave të sillet me shpejtësi para drejtësisë e të marrë dënimin e merituar.
Duke njohur pabarazinë që ka rënduar ndër vite ndaj vajzave dhe grave në punësim, synim i punës sonë mbetet të ngrisim të gjithë mekanizmat që të garantojmë pjesëmarrje të grave dhe vajzave brenda sektorit publik.
Sektorit të sigurisë i nevojiten edhe më shumë gra dhe vajza dhe kjo përbën prioritetin tonë. Vajzat dhe gratë që janë çdo ditë në uniformë kanë dëshmuar se shërbimi për qytetarët e për Republikën nuk ka gjini.
Në këtë ditë të shënuar të 8 Marsit, shpreh mirënjohjen time të thellë për secilën vajzë e secilën grua që ka thyer çdo barrierë para saj. Para vetes kemi shumë sfida të cilat bashkëpunimi e bashkëveprimi si institucione e si shoqëri i tejkalon.
Gëzuar sot dhe çdo ditë, nuk do të reshtim së punuari për barazi e drejtësi, mirëqenie e siguri. /InLajmi/
