Për herë të parë në Republikën e Kosovës si dhe në nivel rajoni, përmes Udhëzimit Administrativ, rregullohet veprimtaria e turizmit aktiv dhe turizmit të aventurës, sipas standardeve evropiane dhe atyre të ERCA (European Ropes Course Association).
Ky Udhëzim Administrativ përcakton kushtet dhe kriteret e sigurisë, që duhet t’i plotësojnë shoqatat profesionale të turizmit dhe shoqëritë tregtare që merren me ofrimin e veprimtarisë së shërbimeve të turizmit aktiv dhe turizmit të aventurës.
Udhëzimi Administrativ rregullon në veçanti kushtet dhe kriteret teknike dhe të operimit të tyre për produktet turistike të rrëshqitjes në litar dhe kurseve me litar.
Për operimin në këtë fushë, nga ofruesit e shërbimeve të turizmit aktiv dhe të aventurës kërkohet që:
Të përdorin pajisje në përputhje me udhëzimet sipas kërkesave teknike dhe atyre të sigurisë të përcaktuara me standarde të veçanta,
Stafi të jetë i trajnuar dhe me përvojë të përshtatshme në teknika.
Të informohen pjesëmarrësit për kushtet dhe rreziqet e mundshme, për nivelin e vështirësisë.
Të ofrohen udhëzime për përdorimin e duhur të pajisjeve.
Njohuri për menaxhimin e grupeve.
Të sigurojnë evitimin e rreziqeve etj.
E gjitha kjo mundëson që produktet tona që ofrohen për shërbim në fushën e turizmit aktiv dhe të aventurës të jenë të sigurta për turistët dhe qytetarët, ndërsa oferta turistike në Kosovë të jetë më atraktive dhe konkurruese në rajon./InLajmi/
