Shaip Kamberi, deputeti i listës “Lufta politike e shqiptarëve vazhdon”, pas takimit konsultativ për formimin e Qeverisë me presidentin e Serbisë Aleksandër Vuçiq, u shpreh se shqiptarët janë për integrim, përmes planit 7 pikësh dhe zhvillimit ekonomik, transmeton InLajmi.
Kamberi tha se nuk është opsion që lista “Vazhdon lufta politike e shqiptarëve”, të cilës ai ishte kryesues në zgjedhjet e dhjetorit, të jetë pjesë e Qeverisë së re të Serbisë.
Ai theksoi se duhet fillimisht të zbatohet plani politik 7 pikësh 10 vjeçar për integrimin e shqiptarëve në organet shtetërore.
Kamberi u tha gazetarëve se ka marrë një premtim nga presidenti serb Aleksandar Vuçiq se plani do të zbatohet, por se çfarë hapash do të ndërmarrë Qeveria e re e Serbisë, mbetet për t’u parë.
“Nuk është normale që shqiptarët janë të nënpërfaqësuar në të gjitha institucionet shtetërore, në nivel lokal dhe rajonal dhe të na kërkohet të përfshihemi në organet qendrore”, tha Kamberi pas konsultimit me Vuçiqin për mandatin për përbërjen e qeverisë së re.
“Kam biseduar disa herë me presidentët e Serbisë për të njëjtat tema dhe duhet të kemi kujdes se çfarë do të ndodhë”, tha Kamberi.
Ai shtoi se nga realizimi i këtij plani varen kushtet për jetën e shqiptarëve në komunat në jug të Serbisë dhe komunikimi me autoritetet në Beograd, shkruan Danas.
Në ndërtesën e Presidencës kanë mbërritur edhe përfaqësues të listës “Partia Ruse”, Sllobodan Nikoliq”, e cila është lista e 2-të zgjedhore që është ftuar të konsultohet për mandatin për përbërjen e qeverisë së re./InLajmi/
