Sekretari për Çështjet Ligjore në Partinë Demokratike, Indrit Sefa reagoi sot ndaj deklaratave të ministrit të Drejtësisë, Ulsi Manja në lidhje me Amnistinë Penale. Sipas Sefës, Manja justifikoi vendimin që synon të amnistojë të korruptuarit.
“Me një akt tinzar në ditën e fundit të diskutimit ndryshuan projektligjin për amnistinë duke i çuar dhe një mesazh kriminal SPAK dhe Gjykatës, se ata mund të dënojnë të korruptuarit, por Edi Rama do t’i falë ata. Kjo është kriminale”, u shpreh Sefa.
Sipas Sefës, bëhet fjalë për amendament antiSPAK që synon që çdo i korruptuar i kësaj qeverie i dënuar me vendim të formës së prerë, të përfitojë ulje dënimi 1 vit meshkujt dhe 1.5 vite femrat.
“Me këtë amendament mundësohet që funksionarët publikë të përfitojnë nga ndjekja penale dhe nga hetimet ndaj tyre”, tha Sefa, shkruan ATSH.
“PD nuk do bëhet kurrë pjesë e këtij pazari të ndyrë dhe kërkon tërheqjen e këtyre ndryshimeve, përfshirjen në amnisti të të gjithë atyre që protestuan kundër kësaj qeverie, për të mbrojtur shtëpitë dhe pronat e tyre”, tha Sefa.
