Kryeministri i Republikës së Kosovës Albin Kurti, së bashku me dhe ministri i Ministrisë së Administrimit të Pushtetit Lokal Elbert Krasniqi, po mbajnë takim me kryetarët e komunave, raporton InLajmi.
Kurti ka mohuar akuzat se po favorizohen komunat e afërta me Lëvizjen Vetëvendosje, i cili tha se buxheti i vitit 2024 është për gati 90 milionë euro më i lartë krahasuar me vitin paraprak 2023, kurse për 3 vite mandat buxheti vjetor i komunave është rritur për 195 milionë euro më shumë.
“Granti i përgjithshëm për komuna për vitin 2024 kap vlerën 284.7 milionë euro, që është granti me vlerën më të madhe ndonjëherë. Komuna e Ferizajt dhe Gjakovës janë komunat me më së shumti projekte infrastruktore, kurse Obiliqi, Skenderaj, Rahovec janë renditur në top 3 komunat përfituese nga granti i performances komunale që ndahet nga Ministria e Administrimit dhe Pushtetit Lokal. Po dëgjojmë fjalë se komunat e afërta me pushtetin po përfitojnë më shumë, e kjo nuk qëndron aspak”, tha ai.
Kryeministri shtoi se secila komunë këtë vit e ka të paktën për 40% më të lartë në krahasim me buxhetin para 3 viteve.
Ai tutje kërkoi nga kryetarët që të mos kontribuojnë në keqinformim të qytetarëve kur vjen puna tek mbështetja e nivelit qendror për atë lokal. /InLajmi/
