Komandanti i Forcës së Sigurisë së Kosovës gjenerallejtënant, Bashkim Jashari me komandantin e Gardës së Ajova-s, gjeneral major Stephen E. Osborn, vizitë në Shtabin e Përgjithshëm të FSK-së, përcjell InLajmi.
Diskutuan për mundësitë e bashkëpunimit ndërmjet Forcës së Sigurisë së Kosovës dhe Gardës Kombëtare të Ajova-s për tre vitet e ardhshme.
Po ashtu biseduan edhe për planet dhe objektivat e përbashkët, duke përfshirë fushat e manovrës, mbështetjes logjistike, mjekësisë, kibernetikës dhe trajnimit të nënoficerëve.
Pas bisedave në Shtabin e Përgjithshëm, gjenerallejtënant Jashari dhe gjeneral major Osborn së bashku me delegacionet e tyre, vizituan Regjimentin e Tretë të Këmbësorisë së Forcave Tokësore në Mitrovicë.
Gjatë vizitës, ata patën mundësinë që të shihnin demonstrimin e aftësive luftarake në poligonin e trajnimit të regjimentit, përfshirë mbështetjen me zjarr, operacionet sulmuese si dhe praktikat e zbulimit dhe raportimit në fushën luftarake.
Forcat Tokësore të FSK-së po zhvillojnë aktivitetet sipas Planit Gjithëpërfshirës të Tranzicionit me qëllim të validimit të kapaciteteve luftarake.
Njoftimi i plotë:
Komandanti i Forcës së Sigurisë së Kosovës dhe Komandanti i Gardës së Ajovas shohin nga afër kapacitetet e Forcës së Sigurisë së Kosovës
Më datë 21 Shkurt 2024, Komandanti i Forcës së Sigurisë së Kosovës (KOMFSK), Gjenerallejtënant Bashkim JASHARI, dhe Komandanti i Gardës së Ajova-s, Gjeneral Major Stephen E. OSBORN, realizuan një vizitë në Shtabin e Përgjithshëm të FSK-së. Gjatë kësaj vizite, u diskutua bashkëpunimi ndërmjet FSK-së dhe Gardës Kombëtare të Ajova-s, duke përfshirë planet dhe objektivat për tre vitet në vazhdim. Në linjë me objektivat e KOMFSK-së u shpalosen detajet e planit të bashkëpunimit në mes të dy institucioneve, duke u përqendruar në fushat e manovrës, mbështetjes logjistike, mjekësisë, kibernetikës, si dhe trajnimit të nënoficerëve. Këto diskutime u bënë në kontekstin e qëllimeve të përbashkëta për ngritjen e nivelit të bashkëpunimit dhe koordinimit mes dy forcave. Në vijim të vizitës, Gjenerallejtënant Bashkim JASHARI, dhe Komandanti i Gardës së Ajova-s, Gjeneral Major Stephen E. OSBORN bashkë me delegacionet e tyre, vizituan Regjimentin e Tretë të Këmbësorisë së Forcave Tokësore në Mitrovicë, ku të dy gjeneralët u njoftuan me aktivitetet, trajnimet dhe të arriturat e kësaj njësie. Në kuadër të kësaj vizite, ata patën mundësinë që të shihnin demonstrimin e aftësive luftarake në poligonin e trajnimit të regjimentit, përfshirë mbështetjen me zjarr, operacionet sulmuese si dhe praktikat e zbulimit dhe raportimit në fushën luftarake. Regjimentet e Forcave Tokësore të Forcës së Sigurisë së Kosovës janë duke realizuar aktivitetet sipas planifikimit dhe zhvillimit të kapaciteteve luftarake me qëllim të validimit sipas Planit Gjithëpërfshirës të Tranzicionit (PGJT)./InLajmi/
