Ish ministrja e Integrimeve Evropiane, Mimoza Ahmetaj, thotë se Kosova aktualisht i ka raportet me SHBA-të e BE-në në pikën më të ulët ndonjëherë.
Ajo në një prononcim për Gazeta Blic, thotë se Kosova po e vuan izolimin dhe sanksionet, duke mos pasur përkrahje financiare.
“Raportet e Kosovës në politikën e jashtme, si me SHBA-të po ashtu edhe me BE dhe shtetet tjera aleate janë në pikën më të ulët që ndonjëherë Kosova i ka pas. Vetë fakti që ne jemi nën sanksione politike dhe ekonomike është treguesi më i mirë se ku i kemi punët. Kosova po e vuan izolimin politik si edhe suspendimin dhe përkrahjen financiare në miliarda euro dhe dollarë të projekteve investuese”, shprehet Ahmetaj.
Ish ministrja vlerëson se dinari është nxjerrë nga kontesti i draft statusit të Asociacionit, që ka ndikuar në spostimit të dialogut.
“Dinari është nxjerrë nga kontesti i draft statusit të Asociacionin, gjë që i kontribuoi edhe spostimit të dialogut nga BE në OKB, për çka Serbia ka lobuar për vite të tëra që një gjë e tillë të bëhet. Siç dihet në KS të OKB, ne nuk i kemi të gjitha shtetet mike dhe ky fakt e sanksionon Kosovën”, potencon ajo.
Ahmetaj shton se Kosova ka humbur përkrahjen ndërkombëtare.
“Kosova ka humbur shumë nga përkrahja ndërkombëtare dhe nuk duhet harruar që interesi i shtetit avancohet duke bërë aleancë dhe partneritet me shtetet të cilat e mbrojtën popullin tonë nga asimilimi dhe e ndihmuan Kosovën në shpalljen e pavarësisë dhe ndërtimin e shtetit”, deklaron ish ministrja Mimoza Ahmetaj.
