Deputeti i Partisë Demokratike të Kosovës, Xhavit Haliti, ka komentuar deklaratën e presidentes Vjosa Osmani se Qeveria duhet të bisedojë me ndërkombëtarët për të gjetur një zgjidhje për çështjen e dinarit.
Ai në një prononcim për Gazeta Blic, thotë se Osmani i ndërron qëndrimet nga mëngjesi në darkë dhe ndryshe flet kur takohet me Kurtin e ndryshe me ndërkombëtarët.
“Zonja Osmani, nga mëngjesi e deri në darkë ndryshon qëndrimet. Tjetër flet kur takohet me Albinin, tjetër kur flet me ndërkombëtarët, tjetër me opozitën, tjetër me kryetarët e partive opozitare e tjetër para mediave. Kështu që është vështirë të dihet cili është qëndrimi i vërtetë i Presidentes së Kosovës”, vlerëson ai.
Deputeti i PDK-së potencon se presidentja duhet të jetë e qartë dhe t’i tregojë qëndrimet e saj për marrëveshjen e Brukselit e Asociacionin.
“Ajo duhet të jetë e qartë dhe publiku i Kosovës e më gjerë duhet ta dijë: cili është qëndrimi i Presidentes lidhur me marrëveshjet e Brukselit dhe zotimit të bërë në Ohër? Cili është qëndrimi i Presidentes lidhur me Asociacionin? Mendoj që këto janë çështjet për të cilat duhet të deklarohet Presidentja”, thekson Haliti.
Ai shton se ajo duhet të jetë e qartë në deklarime dhe të vazhdojë me deklarata herë si përfaqësuese e OJQ-ve, e herë si Komandante Paqësore.
“Apo do të vazhdojë që nga zyra e Presidentit të Kosovës të bëjë deklarata herë si luan, e herë si pulë, herë si përfaqësuese e OJQ-ve, e herë si Komandante Paqësore. Pra, presidentja deklarimet e saja duhet t’i ketë konsistente, të qarta e të sakta”, deklaron deputeti i PDK-së, Xhavit Haliti.
