Ministri i Mbrojtjes, Ejup Maqedonci, thotë se bazat operacionale të ushtrisë dhe xhandarmërisë serbe përreth kufirit me Kosovën janë kërcënim i vazhdueshëm për Kosovën.
Maqedonci tha se kanë dislokim enorm të ushtrisë, policisë dhe xhandarmërisë serbe në jug të Serbisë.
“Po, 48 bazat e përparme operacionale të ushtrisë dhe xhandarmërisë serbe janë një kërcënim i vazhdueshëm për vendin tonë edhe për faktin që këto 48 baza janë në afërsi të kufirit me territorin e vendit tonë, pra janë diku prej 300 metra deri në 5 kilometra nga vija kufitare e Kosovës dhe janë të drejtuara armiqësisht kundër territorit të vendit tonë”, tha ministri.
Gjithashtu, ai tha se përveç 48 bazave, 3 nga 4 brigadat e ushtrisë serbe janë të dislokuara në jug të territorit të Serbisë.
“Përveç këtyre 48 bazave, është për tu theksuar edhe fakti që 3 nga 4 brigadat e ushtrisë serbe janë të dislokuara në jug të territorit të Serbisë, dhe ato të drejtuara armiqësisht kundër territorit të vendit tonë”, tha ai.
Maqedonci tha se shumica e kapaciteteve luftarake të Serbisë, duke përfshirë edhe kapacitetet që janë blerë nga Kina dhe Rusia janë të dislokuara në jug të territorit të Serbisë.
“Kjo nuk paraqet kërcënim vetëm për vendin tonë, por, për të gjithë regjionin e Ballkanit Perëndimor dhe për vendet tjera që kufizohen me Republikën e Kosovës”, shkruan TëVë1.
“Duke i shtuar kësaj edhe veprimet e fundit që janë ndërmarrë nga grupe të armatosura paramilitare të udhëzuara nga strukturat e sigurisë së Serbisë, ky rrezik është shumë i lartë”, tha ministri.
