Shefja e deputetëve të Lëvizjes Vetëvendosje, Mimoza Kusari-Lila, u shpreh se liria dhe shteti i Kosovës janë të çmuara dhe se lufta për liri dhe shtet po mbrohet edhe sot në Hagë, ku po gjykohen ish-krerët UÇK-së.
Në seancën solemne për ndër të Ditës së Pavarësisë fjalën, Kusari-Lila, përmendi vizitat e fëmijëve që i kanë bërë ditëve të fundit në Kuvendin e Kosovës, për çka tha se janë kujtesë për përgjegjësinë tonë që shtetin ta forcojmë sa më shumë.
“Megjithatë jo shumë larg në historinë e Kosovës edhe fëmijët u sakrifikuan së bashku me heronjtë, sepse ata nuk u kursyen nga terrori dhe agresioni i Serbisë”, u shpreh Kusari-Lila.
Kusari-Lila ndër tjera u shpreh se liria dhe shteti i Kosovës janë të çmuara dhe se vlerat e tyre duhet të rikujtojë faktin se duhet të bëhet përpjekje që e kaluara nuk duhet të përsëriten më asnjëherë.
Ajo tha se liria e demokracia po cenohen në rajon dhe më gjerë duke përmendur rastin e Rusisë dhe sulmin ndaj Ukrainës, madje Kusari-Lila përmendi edhe rastin e keqtrajtimit të politikanit serb, Nikolla Salludoviq pasi bëri homazhe në Prekaz.
“Lufta jonë për shtet e liri ka vazhduar dhë është mbrojtur edhe nga polici Enver Zymberi, por po vazhdon të mbrohet edhe sot në Hagë”, theksoi ndër tjera.
Shefja e GP-së të Vetëvendosjes ka pasur edhe një kërkesë për të gjithë shqiptarët që jetojnë jashtë Kosovës, shkruan EO.
“Për të gjithë ata që festojnë jashtë vendit, kam një porosi: ejani më shpesh në Kosovë, vizitoni bukuritë e vendlindjes, mësoni fëmijët t’i gëzohen agimit të diellit në Kosovë. Nuk ka forcë që mund të ndal vullnetin e shtetit tonë për të dëshmuar potencialin dhe pasurinë njerëzore që ka. Sot kemi festë, jo veç në Kosovë po kudo që ka shqiptar dhe komunitete që vijnë nga Kosova”, ka thënë ajo.
