Kryetari i Kuvendit të Kosovës, Glauk Konjufca, në një fjalë rasti në seancën solemne për nder të përvjetorit të pavarësisë së Kosovës, ka rikujtuar rrugën plot mund të popullit të Kosovës deri në çlirim e pavarësim.
Konjufca ka thënë se në themelet e shtetit të Kosovës është heroizmi i Jasharajve, urtësia e Ibrahim Rugovës dhe ideali i Adem Demaçit.
“Në themelin e Kosovës qëndron heroizmi i Jasharajve, urtësia e Rugovës dhe ideali i Adem Demaçit”, ka thënë Konjufca.
Ai tutje ka thënë se populli i Kosovës kishte duruar derisa bota demokratike u bind se aspirata e Kosovës ishte e drejtë dhe kur e pa që populli i Kosovës më parë e jep jetën sesa që i nënshtrohet Serbisë.
Konjufca ka thënë se kur ndërkombëtarët e panë që lufta ishte e pastë, ata e ndihmuan Kosovën për ta larguar Serbinë.
“Ne duruam deri kur bota demokratike u bind se kemi të drejtë. Kur bota e pa që më parë e japim jetën sesa nënshtrohemi para Serbisë dhe kur e pa që lufta jonë është e pastër, na ndihmoi për ta larguar dikatorin”, ka thënë Konjufca.
“Si popull, e kemi edhe durimin edhe guximin”, ka shtuar tutje ai.
Konjufca ka thënë se Kosova nuk i harron aleatët pa të cilët rruga e Kosovës do të ishte e pamundur, shkruan GazetaSinjali.
“Nuk i harrojmë miqtë tanë pa të cilët rruga jonë do të ishte e pamundur, veçanërisht SHBA-në dhe shtetet e BE-së. gjithashtu edhe NATO-n që e ndali gjenocidin e Serbisë në Kosovë.”, ka potencuar Konjufca.
