Kryeministri i Shqipërisë Edi Rama mori pjesë këtë të enjte në mbledhjen e Komitetit Ekonomik dhe Social Evropian në Bruksel.
Në konferencën e përbashkët për shtyp së bashku me Presidentin e Komitetit Europian për Ekonominë dhe Çështjet Sociale (EESC), Oliver Röpke, zëvendëspresidenten e deleguar të Komisionit Europian të Vlerave dhe Transparencës Věra Jourová , si dhe kryeministrin e Malit të Zi Milojko Spajiq, Rama tha se ajo që po ndodh në Komitetin Ekonomik duhet të ndodh dhe në institucionet e tjera të BE.
Sipas tij pjesëmarrja e vendeve të Ballkanit perëndimor në mbledhjen e Komitetit Ekonomik dhe Social pa të drejtë vote, është një shembull që duhet të ndiqet dhe nga Parlamenti Europian, Komisioni dhe Këshilli për të mbajtur sa më pranë rajonin.
Kreu i qeverisë shtoi se u desh Vladimir Putin dhe agresioni në Ukrainë që BE të avanconte proceset integruese në Balkan. Ai bëri thirrje që unioni të mos presë një fatkeqësi tjetër për t’u kujtuar për hapin e radhës, shkruan Telegrafi.
“Unë besoj fort se është tani koha që Bashkimi Evropian të kuptojë se vendet kandidate të Ballkanit Perëndimor janë mjaftueshëm të pjekura dhe janë në një situatë ku duhet të përqafohen dhe të sillen më pranë pa qenë anëtarë me të drejta të plota që është objektivi qëndror i këtij procesi. Ajo që po ndiodh sot është një shembull ekzemplar që kjo duhet të ndodh dhe me institucionet e tjera të BE-së. Kjo që ndodhë këtu duhet të ndodhë dhe në Komisionin Evropian, Parlamentin Evropian dhe Këshillin Evropian”.
