Nënkryetari i Aleancës për Ardhmërinë e Kosovës, Ahmet Isufi, ka thënë se Kosova rrezikon të sanksionohet si rezultat i moskoordinimit me aleatët.
Ai ka thënë se nëse një gjë e tillë ndodh, do të pësonte vendi.
Isufi në emisionin “Ditari” në Tëvë 1, ka thënë se veprimet e Kurtit të cilat po tensionojnë raportet me aleatët janë krejtësisht të pakuptueshme.
“Është krejtësisht e pakuptueshme se si është duke vepruar me tensionimin e marrëdhënieve të brendshme, me tensionimin e marrëdhënieve me jashtë. Është një logjik që është përdor edhe sa ka qenë në opozitë LVV se të gjithë janë kundërshtarë dhe se vetëm ai dhe njerëzit që janë rreth tij vlejnë”, ka thënë Isufi.
Isufi ka komentuar edhe deklaratën e ambasadorit amerikan i cili tha se raportet me Kosovën janë lëkundur për shkak të vendimit për dinarit.
Deklarata e tij vije pas asaj të Kurtit i cili tha se raportet me SHBA-në janë të mira.
Sipas Isufit Hovenier “vetëm sa nuk tha se Kurti ka rrejt”, e që sipas tij kjo ishte shumë e rëndë
Ambasadori amerikan, Jeffrey Hovenier, ka thënë se kjo situatë ka prekur marrëdhëniet dhe çdo deklarim nga eksponentë qeveritarë se çdo gjë është në rregull, nuk është e vërtetë.
“Ne do të shpresonim që Qeveria dhe kryeministri Kurti do të angazhohen si partner që ta zgjidhim këtë çështje së bashku, në vend se të ndërmarrin veprime të njëanshme dhe të kundërtën e asaj që kemi kërkuar. Jemi të shqetësuar që Qeveria dhe kryeministri Kurti nuk e kanë bërë këtë. Çfarëdolloj deklarimi se gjërat janë në rregull dhe se marrëdhëniet tona vazhdojnë, nuk janë të vërteta. Kjo situatë ka prekur partneritetin tonë. Çdo shpjegim tjetër është keqkuptim”, ka thënë ai.
