Figura e kryeministrit të Kosovës, Albin Kurti tashmë është shkrirë në bronz, në shtatoren që është vendosur sot në oborrin e shtëpisë së një mërgimtari në fshatin Peran të Podujevës, i cili aktualisht jeton dhe vepron në Spanjë.
Këto raste janë të rralla kur u ndërtohen shtatore personaliteteve derisa ata janë gjallë. Mirëpo, këtë iniciativë mërgimtari Sabahudin Uka, thotë se e ndërmori për dashurinë e madhe që ka për kryeministrin Kurti.
Uka tha se ideja i kishte ardhur para 3 vitesh, kur partia e kryeministrit Kurti i fitoi zgjedhjet në vend.
“Tash po duket që është shtet, që po funksionon diçka. Ne mërgimtarët jemi shumë të ndjeshëm. Edhe pse po na keshin nëpër media, jemi shumë të ndjeshëm. Ma merr mendja që 90% e mërgimtarëve kanë qejf me u kthye këtu. Janë mësu me kushte më të mira atje. E, tani s’mund të kthehen këtu. Veç pak me u ndreq këtu, krejt kthehen. Unë për vete këqyri me u kthy. Edhe një vit jam këtu. Për momentin 20 vjet jetoj në Spanjë. Kam jetu edhe në Gjermani”, ka thënë Uka.
Uka tha se këtë shtatore e ka punuar skulptori Agron Blakçori dhe se ka kushtuar 50.000 euro.
“Me ftue s’kena mujt, ama mediat mbrëmë kanë bo bum të madh. Po tash i ka punët e veta s’mund të vjen dhe ai (Kurti)”.
I pyetur se a e ka takuar ndonjëherë kryeministrin, ai tha: “Jo, kurrë hiç. Shoqja e ka takuar para 2 vitesh, e unë jo. Veç që unë e du. Edhe këtu ia kam shkru ‘Shpresa e fundit’, se mendoj që është shpresa e fundit për mu kthye e me rrnue këtu”.
Uka tha se këtë shtatore do ta mbajë në oborr dhe se nuk pranon që ta zhvendosë diku tjetër, shkruan Telegrafi.
“Që don dikush me bo diçka në ndonjë vend publik, unë mund të investoj e të ju ndihmoj. Kjo shtatore nuk luhet nga këtu”, tha ai.
