Paslufta si periudhë mbijetese nga përjetimet e luftës është tema kryesore e filmit “Afterwar”, i cili do të përfaqësojë rrëfimin kinematografik nga Kosova në Berlinale, festivalin ndërkombëtar të filmit në Berlin.
Qendra Kinematografike e Kosovës ka publikuar trailerin zyrtar të filmit me regji të Birgitte Stærmose, i cili në pak minuta shpërfaq dimensione të ndryshme të ballafaqimit psikologjik pas traumave.
“Në një bashkëkrijim me kastën e filmit Gëzim Kelmendi, Xhevahire Abdullahu, Shpresim Azemi, Besnik Hyseni dhe Luan Jaha, regjisorja Stærmose ka krijuar një film mahnitës në rrafshin kinematografik e mbërthyes në rrafshin emocional, dhe një portret kolektiv të një gjenerate të tërë të të mbijetuarve, i cili menjëherë tërheq paralele me të gjithë fëmijët e kapur nga luftërat sot”, njofton QKK, shkruan RTK.
Edicioni i 74-të i Berlinales do të mbahet nga datat 15-24 shkurt.
