Ministri i Mbrojtjes Ejup Maqedonci gjatë raportimit të tij në Komisionin për Çështje të Sigurisë dhe Mbrojtjes lidhur me raportin vjetor të punës për 2023-ën tha se gjatë vitit 2023 gjithsej janë larguar 221 pjesëtarë të Forcës së Sigurisë së Kosovës, përcjell InLajmi.
“Sa i përket daljeve, gjatë vitit 2023 gjithsej janë larguar 221 pjesëtarë të Forcës së Sigurisë së Kosovës, duke përfshirë pjesëtarët aktivë, rezervë dhe nëpunës civilë. Këtu hyn edhe pensionimi i rregullt, që janë 59 pjesëtarë. Pensionim jo i rregullt: 2 civilë, pensionim pas arritjes së moshës: 14 pjesëtarë, ndërprereje vullnetare të shërbimit kanë pasë 129 pjesëtarë, ndërprerje vullnetare të shërbimit të rezervës: 4, ndërprerje vullnetare të shërbimit, një civil, shkarkim nga shërbimi ka qenë një, kanë humbur statusin e pjesëtarit të FSK-së 2 pjesëtarë dhe largim nga bordi, kemi pasë 7 si dhe 2 pjesëtarë…”, tha Maqedonci.
Kryetari i Komisionit njëherësh deputeti i Partisë Demokratike të Kosovës Bekë Berisha, e ndërpreu duke thënë “ndalemi që këta që e kanë lëshu. Që nuk janë pensionistë por e kanë lëshu”.
“Arsyet janë të ndryshme, duke filluar nga mirëqenia, pra nga aspekti i pagës, te mundësitë që u ofrohen jashtë institucionit”, tha ministri.
Maqedonci tha se ky nuk është trend vetëm tek ne por është edhe trend global duke shtuar se të gjitha ushtritë aktualisht janë duke u ballafaquar me mbajtjen e personelit.
“Ky nuk është trend vetëm te ne, është trend global. Të gjitha ushtritë aktualisht janë duke u ballafaquar me mbajtjen e personelit, kjo edhe për faktin që në kuadër të ushtrisë, si oficerët, gjithashtu nënoficerët dhe ushtarët zhvillojnë shkathtësi të veçanta, marrin trajnim të veçantë i cili shpesh u mundëson atyre të bëhen subjekt gjuetie nga kompanitë e ndryshme jashtë institucionit, duke përfshi edhe institucionet shtetërore”, tha ai.
“Jo gjithmonë për shkak të mirëqenies, shpesh edhe për shkak të mundësive që u ofron ushtrimi i profesionit të tyre edhe në strukturat tjera”, tha ai.
“Unë po e shoh shqetësuese ende këtë çështjen e mbajtjes së personelit dhe do të jetë shqetësuese edhe për vitet me radhë”, tha Maqedonci. /InLajmi/
