Këshilli Kombëtar Shqiptar në Luginë të Preshevës për çdo vit financohet nga Qeveria e Serbisë me buxhet.
Varësisht nga numri i popullsisë, aq janë edhe mjetet që i merr ky Këshill.
Por këtë vit, pavarësisht numrit të madh të popullsisë, buxheti i është zvogëluar Këshillit për mbi 1 milion dinarë, apo rreth 8.000 euro më pak.
Kryetari i këtij Këshilli, Nevzad Lutfiu thotë për “Front Online”se kanë pritur që do të marrin më shumë buxhet pas rritjes së numrit të shqiptarëve në Luginë, ngase, siç thotë ai, me këtë shumë e kanë të vështirë funksionimin e Këshillit.
Ai ka bërë të ditur se i ka informuar autoritetet ndërkombëtare për këtë vendim të Qeverisë së Serbisë.
Pavarësisht diskriminimit që po u bëhet, deri më tani nuk ka pasur reagim e as presion nga ndërkombëtarët ndaj Serbisë.
“Kriteret përcaktuese për buxhetin, kryesori është numri i popullsisë i komuniteteve, domethënë sa më i madh që është komuniteti aq më i madh është buxheti për atë këshill. Ne jemi në mesin e komuniteteve më të madha në Serbi edhe në 2022 kemi dalë në regjistrimin e popullsisë kemi parë një pasqyrë krejt të re të popullsisë, për shkak që në 2011 e kemi bojkotuar regjistrimin e popullsisë dhe na kanë konfirmuar se për shkak të numrit të ri të shqiptarëve që është deklaruar në regjistrimin e fundit buxheti për këshillin ka me qenë në rritje domethënë 40% më shumë se sa që ka qenë ai në vitin paraprak”, u shpreh ai.
Kryetari i Këshillit të Shqiptarëve në Luginë: Serbia na e zvogëloi buxhetin, edhe pse kemi rritje të popullsisë
Kryetari i Këshillit Kombëtar Shqiptar në Luginë, Nevzad Lutfiu ka thënë që buxheti u zvogëlua për 8.000 euro më pak, pavarësisht se ka numër më të madh të popullsisë.
E kjo sipas tij, e vështirëson “mbijetesën” e këtij Këshilli.
“Me vendimin që morën, buxheti jo që rritet por zvogëlohet për diku 8.000 euro, që do të thotë se e vështirëson jashtëzakonisht funksionimin e Këshillit”, ka thënë ai.
Lutfiu thotë se në vitin e kaluar i kanë marr mbi 130.000 euro buxhet vjetor.
E këtë herë, nuk e kanë marr parasysh kriterin e popullsisë.
“Në vitin e kaluar i kemi marr 15 milionë dinar, që i bie mbi 130.000 euro. Regjistrimi i fundit ka dalë që janë diku mbi 100.000 edhe pse enti i statistikave ka dalë me një numër të ri, por edhe me numrin e statistikave që i ka enti, buxheti është dashur që prapë me dalë me një rritje të ndjeshme, por në këtë vit nuk e kanë marrë parasysh”, u shpreh ai.
Nevzat Lutfiu: Kemi marr premtim nga Qeveria e Kosovës për mbështetje
Këshilli Kombëtar Shqiptar në Luginë të Preshevës, pavarësisht buxhetit të vogël që iu nda, ka shpresë për një ndihmë tjetër që iu premtua nga Kosova.
Kryetari Nevzad Lutfiu tha që kanë marr premtime nga Kurti që do të kenë mbështetje për këtë çështje.
“Ne i kemi shkruar edhe Ministrisë për qasjen diskriminuese që e kanë pas kemi kërkuar që me shiku sa më shpejt këtë vendim të tyre, i kemi shkruar edhe ministrisë, i kemi njoftuar edhe zyrtarët ndërkombëtarë, dhe kemi kërkuar mbështetje edhe prej Kosovës me mbulu pjesën e këtij dëmi që ju ka bërë institucionit të vetëm të shqiptarëve në Serbi. Unë besoj që shumë shpejt kemi me pasë një mbështetje prej Qeverisë së Kosovës”, deklaroi ai.
Kreu i Këshillit të Shqiptarëve në Luginë: Po na shkelen të drejtat, presioni i ndërkombëtarëve duhet të jetë më i madh
Kreu i Këshillit Kombëtar Shqiptar në Luginë të Preshevës, Nevzad Lutfiu, ka folur rreth diskriminimit që po iu bëhet shqiptarëve nga Serbia.
Ai thotë që reagimi i ndërkombëtarëve do të duhej të ishte më i madh, pasi sipas tij, po iu bëhen shkelje e të drejtave nga Serbia.
“Normalisht reagimi i ndërkombëtarëve do të duhej të ishte shumë më i madh pasi që kemi të bëjmë me shkelje të drejtave të njeriut, normalisht që do të duhej të ishte reagimi i ndërkombëtarëve shumë më i lartë, presioni shumë më i madh ndaj Serbisë, sepse kemi raporte ndërkombëtare që flasin se pasivizimi është selektiv dhe ka target komunitetin shqiptar”, deklaroi ai.
E për këtë, si Kosova ashtu edhe Shqipëria, sipas Lutfiut duhet të bëjnë më shumë.
Ai thotë që do të insistojnë që Kosova dhe Shqipëria të bëjnë një strategji për t’i mbrojtur interesat e shqiptarëve në Serbi.
“Do të duhej të përpilonin një strategji kombëtare përmes secilës trajtohen interesat e shqiptarëve në Luginës së Preshevës, strategji e cila është dashur të përpilohej nga Kosova dhe Shqipëria, dhe ne do të insistojmë që të kemi një strategji kombëtare për ruajtjen e identiteti kombëtar të shqiptarëve në Serbi”, theksoi ai.
