Kryesuesi i Kuvendit Komunal të Prishtinës, Pëllumb Bajqinovci, ka folur rreth prishjes së koalicionit mes LDK-së dhe PDK-së pas 2 vjet bashkëqeverisje në kryeqytet.
Bajqinovci që vjen nga radhët e Lidhjes Demokratike të Kosovës tha se Kosova problemet me partnerin e koalicionit nisën vitin e kaluar.
“E kemi pasur një problematikë vitin e kaluar në muajin gusht, ku pozita e humb shumicën në Kuvend. Dhe realisht pas asaj situate, situate të vështirë rikthehemi pas një muaji e diçka rikthehemi dhe shfaqet problematika tjetër, ku opozita e konteston zgjedhjen e kryesuesit dhe kërkojnë që organet më të larta ligjore ta procesojnë tutje, dhe nuk kanë marrë pjesë në disa takime”, tha ai, shkruan Klan Kosova.
“Kjo ka qenë një fazë e vështirë e cila e ka dobësuar punën në Kuvend. Vendimet të cilat merren sigurisht që janë më të mira kur shumica është në Kuvend. Pastaj në fundvit, na shfaqen sërish problematikat, ku partneri nuk merr pjesë në 3 seanca, një ka qenë e jashtëzakonshme dhe 2 të rregullta”, theksoi kryesuesi i Kuvendit Komunal, Pëllumb Bajqinovci.
