Hamasi thotë se ka dhënë përgjigjen e tij ndaj një propozimi për një armëpushim të ri në Gaza.
Sipas mediave të huaja, detajet e marrëveshjes të përcaktuara nga Izraeli, SHBA, Katari dhe Egjipti, nuk janë bërë publike.
Më herët u raportua se propozimi përfshinte një armëpushim 6 javor, kur më shumë pengje izraelite do të shkëmbeheshin për të burgosur palestinezë.
Izraeli dhe SHBA kanë thënë të 2 se po shqyrtojnë përgjigjen e Hamasit.
Sekretari amerikan i Shtetit, Antony Blinken, i cili aktualisht ndodhet në Lindjen e Mesme, tha se do të diskutonte përgjigjen e Hamasit me zyrtarët në Izrael të mërkurën.
Ndërsa Blinken nuk ka dhënë asnjë tregues se si SHBA e shikon përgjigjen, Presidenti Joe Biden e përshkroi atë si “pak mbi krye”, duke thënë se udhëheqja izraelite nuk do të pajtohet lehtësisht me atë që grupi po kërkon.
Një zyrtar i lartë i Hamasit i tha BBC-së se grupi kishte paraqitur një “vizion pozitiv” në përgjigje të kornizës, por kishte kërkuar disa ndryshime në lidhje me rindërtimin e Gazës, kthimin e banorëve të saj në shtëpitë e tyre dhe dispozitat për ata që kishin qenë të zhvendosur.
Zyrtari tha se Hamasi kishte kërkuar gjithashtu ndryshime në lidhje me trajtimin e të plagosurve, duke përfshirë kthimin e tyre në shtëpi dhe transferimin në spitale jashtë vendit.
Propozimi iu dërgua Hamasit rreth një javë më parë, por një përfaqësues i tha agjencisë së lajmeve Reuters se u ishte dashur deri të martën për t’u përgjigjur sepse pjesë të tij ishin të paqarta, shkruan Euronews.al.
Kryeministri i Katarit Sheikh Mohammed Bin Abdulrahman al Thani e ka përshkruar përgjigjen e Hamasit si “pozitive” në përgjithësi.
