Nën organizimin e Bankës Qendrore të Republikës së Kosovës, në vazhdën e takimit të Këshillit Kombëtar të Pagesave, në Prishtinë këtë të enjten ka nisur punëtoria e fokusuar në tematikat kryesore që lidhen me sistemin e pagesave, direktivat e Bashkimit Evropian, praktikat e vendeve të tjera dhe reflektimin e tyre në draftin e Ligjit të Sistemit të Pagesave, përcjell InLajmi.
Kjo punëtori do të mbahet për 2 ditë radhazi me mbështetjen e projektit të Bankës Botërore dhe e sponsorizuar nga Bashkimi Evropian.
Takimin me fjalë përshëndetëse e hapi Guvernatori Ahmet Ismaili, i cili falënderoi lidershipin dhe ekipin e Bankës Botërore dhe te gjithë të pranishmit, duke shtuar se kjo reformë do të ketë ndikim pozitiv në gjithë ekonominë e vendit, jetën e qytetarëve, lëvizjen e lirë të kapitalit, si dhe të bëjë të mundur anëtarësimin në SEPA.
Postimi i plotë i saj:
Mbahet punëtoria 2 ditore e BQK-së me sektorin financiar si dhe Bankën Botërore
Nën organizimin e Bankës Qendrore të Republikës së Kosovës, në vazhdën e takimit të Këshillit Kombëtar të Pagesave, më 1 dhe 2 shkurt po mbahet punëtoria e fokusuar në tematikat kryesore që lidhen me sistemin e pagesave, direktivat e Bashkimit Evropian, praktikat e vendeve të tjera dhe reflektimin e tyre në draftin e Ligjit të Sistemit të Pagesave, që pritet të procedohet nga BQK-ja në muajin në vijim.
Kjo punëtori mbahet me mbështetjen e projektit të Bankës Botërore (BB), të sponsorizuar nga Bashkimi Evropian, Modernizimi i Sistemit të Pagesave të Vendeve të Ballkanit Perëndimor, nën koordinimin e Këshillit për Bashkëpunim Rajonal (RCC).
Pjesëmarrës në ketë takim ishin përfaqësuesit e BQK-së, institucioneve financiare bankare dhe jo-bankare, ekspertët e BB-së në përbërje të Holti Banka, Oya Pinar Ardic Alper, Bernardo Leal Correia Antunes Barradas, Peter Christian Moeller Jensen, Edlira Dashi, Blerta Qerimi, Leila Maxhuni nga Ministria Federale e Financave të Gjermanisë si dhe prezantues tjerë të bankave qendrore dhe komerciale të BE-së, përfshirë, Znj. Silvia Di Lillo përfaqësues të Këshillit Evropian të Pagesave (EVP)./InLajmi/
