Ambasadori amerikan në Serbi Christopher Hill tha se Marrëveshja e Ohrit nuk nënkupton njohje, por normalizim të marrëdhënieve ndërmjet Kosovës dhe Serbisë, transmeton InLajmi.
Hill tha për portalin Bujanovacke se Serbia e ka përmbushur një pjesë të mirë të asaj marrëveshjeje dhe ajo që ka mbetur më e rëndësishmja, është gjetja e mënyrës së anëtarësimit të Kosovës në organizatat ndërkombëtare.
Nga ana tjetër, siç theksoi ambasadori, Serbia ka të drejtë në Asociacionin e Komunave Serbe.
“Në Kosovë Asociaciononin e shohin si një lloj Republika Serbe në Bosnje dhe Hercegovinë, por Asociacioni nuk ka ngjashmëri me atë në Bosnje-Hercegovinën. Megjithatë, të gjithë kanë të drejtën e mendimit të tyre, por jo të shtrembërojnë faktet. Para së gjithash Serbia ka të drejtë të kujdeset për shëndetin dhe arsimimn e serbëve dhe kjo bëhet përmes Asociacionit”, tha Hill.
Ai ka theksuar se kuptimi i Marrëveshjes së Ohrit është “normalizimi i marrëdhënieve ndërmjet Kosovës dhe Serbisë”.
“Që njerëzit duke kaluar nëpër pikat kufitare nuk mendojnë për politikë, por për rritjen e cilësisë së jetës së tyre”, tha ai.
Ai theksoi se beson në normalizim pasi siç tha ai “çdo gjë është e mundur nëse njerëzit duan të bisedojnë”.
Ambasadori Hill sot ka vizituar redaksinë e portalit Bujanovci, ku është njohur me kushtet në të cilat funksionon./InLajmi/
