Musa Damati, avokati i deputetit të AAK-së, Pal Lekaj, e ka quajtur si të padrejtë dhe skandaloz vendimin e Gjykatës Themelore të Prishtinës, e cila e dënoi Lekajn me 3 vjet e 8 muaj burgim për rastin e ndarjes së 53 milionë eurove shtesë konsorciumit “Bechtel-Enka” për ndërtimin e autostradës “Arbën Xhaferi”.
Dama ka thënë se për të autorizuar transaksionin prej 53 milionë eurosh, ish-ministri i Infrastrukturës nuk ka marrë vendim individual, por se është procesuar në qeveri.
“Vendimi sotëm, jo veç që është i padrejtë, por është edhe një vendim skandaloz. Dhe këtë mbrojtja e ka potencuar menjëherë në deklarimin e saj. Dhe kjo për arsye se gjatë këtij procesi gjyqësor, i cili për më tepër se dy vite zhvillohet pranë Gjykatës Themelore në Prishtinë… janë prezantuar aq shumë prova, aq shumë fakte, janë dëgjuar aq shumë dëshmitarë, përmes të cilëve është arritur të vërtetohet një gjendje tjetër faktike nga ajo që është përshkruar akti akuzues i PSRK-së.
Dhe në atë çështje voluminoze në rastin më të madh financiar që është trajtuar… përmes provave që janë prezantuar, por edhe dëshmitarëve, kemi digju dh kemi arritë se vendimmarrja në këtë çështje është vendimmarrje kolegjiale. Pra, komiteti drejtues ndërministror, i cili është drejtuar nga ana e klientit tim, ish-ministrit të Infrastrukturës, nuk ka qenë në organ vendimmarrës, por ka qenë organ vetëm që ka rekomanduar ka dërguar për këshill, pra ka pasur karakter të propozimit… Sipas nesh, është arritur të vërtetohet se klienti im nuk ka marrë vendim individual, po është procesuar në Qeverinë e Kosovës, i cila me vota unanime, pa vërejtjen e ministrave të saj, kanë marrë vendim për ta autorizuar transaksionin prej 53 milionë eurove”, shkruan Dukagjini.
Damati ka bërë të ditur se do t’i drejtohet Gjykatës së Apelit dhe janë të bindur se ky vendim do të ndryshojë.
