Ish-diplomati, Ylber Hysa ka thënë se drafti i Asociacionit për Komunat me shumicë serbe është shumë kompleks dhe problematik duke thënë se nuk është një produkt i negocimit inteligjent.
Në emisionin “FIVE” të TV Dukagjinit, Hysa ka theksuar se ka shumë elemente të kombinuara në këtë draft për të cilat koha do të tregojë se a janë të cenueshme apo jo për frymën e Kushtetutës së Kosovës.
Sipas tij, këto elemente përbëjnë një risi të koklavitur që mund të ketë sfida e rreziqe për Kosovën.
“Ka shumë elemente të kombinuara në këtë draft për të cilat koha do të tregojë se a janë të cenueshme për frymën e Kushtetutës, ka elemente të cilat nuk janë të njohura që përbëjnë një risi jo shumë të lehtë e të koklavitur, me rreziqe që mund të ketë sfida për Kosovën. Koha do ta tregojë se sa kompleks është ky draft, për mua është kogja problematik, nuk është produkt i negocimit inteligjent”, ka thënë Hysa.
