Të premten në Podujevë është vendosur gurthemeli për ndërtimin e Qendrës Rezidenciale për persona të moshuar, ndërsa gurin themeltar e vuri kryeministri i Kosovës Albin Kurti i cili tha se për moshat e shkuara duhet të kujdesemi sikur për fëmijët, raporton InLajmi.
Ndërsa ndihet i lumtur për ndërtimin e qendrës për të moshuarit, shefi i ekzekutivit vuri në pah qendra do të ketë hapsirën prej 2700 metra katror dhe për këtë investim janë dhënë 530.000 euro nga shteti, kurse 2 milion investime janë nga organizata “Jetimat e Ballkanit”.
“Jemi këtu me kryetarin Podujevës dhe me veprimtarinë e shquar sociale Halil Kastratin, që të vëmë gurthemelin e Qendrës Rezidenciale për të moshuar e cila do ta ketë sipërfaqen 2700 metra katror. Meqë rast 530 mijë euro janë investim nga shteti nga Komuna, ndërkaq investim i organizatës ‘Jetimët e Ballkanit’ janë 2 milionë euro. Kjo Qendër Rezidenciale për të moshuar do ta ketë parkun, do ta ketë fizioterapinë por gjithashtu do ta ketë edhe kujdesin primar shëndetësor”, u shpreh Kurti.
Ai foli edhe për kushtet të cilat do ti ofrojë qendra ndërsa falënderoi udhëheqjen e komunës dhe humanistin Halil Kastratin për investimin.
“Do ta ketë edhe bujtinën andaj do të jetë moderne në çdo aspekt me kushte tejet të mira për ata të moshuar të cilët do ta gëzojnë pleqërinë e tyre këtu me këtë rast e falënderoj Halil Kastratin e falënderoj Komunën e Podujevës dhe falënderojë të gjithë këta veprimtarë e personalitete që janë këtu me neve në këtë përurim sot. Duhet të kujdesimi për të gjitha shtresat e popullsisë për të gjitha moshat në vendin tonë. E unë do të thosha që ashtu siç kujdesimi për fëmijët duhet të kujdesemi edhe për pleqtë sepse ata kanë kontribuar shumë për vendin tonë dhe meritojnë pleqëri të dinjitetshme”, tha kryeministri.
Ndërkaq kryetari i Podujevës, Shpejtim Bulliqi, tha se në këtë qendër do të kenë mundësi që të marrin shërbime afër 100 të moshuar.
Ai falënderoi bamirësin Kastrati për kontributin që është duke e dhënë për këtë kategori të shoqërisë.
“Kjo është një shenjë që po tregojmë përveç investime që po i bëjmë në infrastrukture publike shkollore, është radha të mendojmë edhe për këtë kategorie të moshuarave. Këtu do të kenë mundësin qe te marrin shërbime përafërsisht 100 të moshuar brenda ditës. Ketë rast e falënderoj bamirësin ton Halil Kastratin për krejt ketë ndihmë që po bënë në komunën tonë ne kategorinë e të moshuarave”, tha Bulliqi.
Disa fjalë për projektin i tha edhe humanisti Halil Kastrati, ndërsa theksoi se ky projekt ka ardhur pas një bashkëpunimi mes organizatës së tij dhe komunës së Podujevës.
“Ky projekt vjen pas një bashkëpunimi të mirëfillt mes ‘Jetimëve të Ballkanit’ dhe Komunës së Podujevës. Ne, përveç këtij projekti, kemi realizuar edhe mbi 100 shtëpi nevojtare për komunën e Podujevës. E kemi zgjedhur ditën e sotme meqenëse jemi në prag të Ditës së Heronjve te Podujevës. I falënderoj familjarët e tyre për pjesëmarrje po ashtu faleminderit Kryeministër kryetar Bulliqi për bashkëpunim”,tha Kastrati.
Bëhet e ditur se Qendra do të ofrojë qëndrim ditor për të moshuar, kuzhinë humanitare për nevojtarë dhe bujtinë për studentë./InLajmi/
