Ministri i Jashtëm i Serbisë, Ivica Daçiq, duke komentuar vendimet e Prishtinës, kryeministrit të Kosovës, Albin Kurti, siç është heqja e dinarit serb, tha se Kurti do të ketë një milion ide për të dëshmuar se ka diçka që në fakt nuk e ka, që është shtetësia, transmeton InLajmi.
“Kurti do të ketë një milion ide lidhur me nxjerrjen në pah të diçkaje që nuk e ka, që është shtetësia. Ideja e tij është që të ketë përshkallëzime të reja”, tha Daçiq për Pink.
Siç shtoi ai, ashtu si dikush që ka nevojë për prova sepse të gjithë e dinë se është e kundërta, edhe Prishtina dëshiron të shkruajë “Republika e Kosovës” kudo.
“Megjithatë, dikush që nuk ka diçka do të shkruajë kudo vetëm për ta vërtetuar atë. Në fletëvotim kanë shkruar edhe Republika e Kosovës për të vërtetuar se kanë shtet. Problemi është se bashkësia ndërkombëtare e toleron dhe thotë se nuk mund t’i bëjnë presion Kurtit. Epo, ata nuk mund të bëjnë asgjë”, deklaroi shefi i diplomacisë serbe.
Ai thekson se situata në lidhje me Kosovën është e turbullt, si dhe se duhet një politikë shtetërore që do të bazohet në ruajtjen e integritetit territorial dhe sovranitetit të Serbisë, pra me një politikë të mençur dhe interesa të tjera kombëtare.
Ne kemi nevojë për një politikë të mençur që do të bazohet në faktin se ne nuk do ta njohim pavarësinë e Kosovës e do të lejojmë anëtarësimin në OKB, ndërsa në anën tjetër kemi një politikë të mençur për t’i arritur të gjitha këto pa dëmtuar interesat kombëtare dhe mendoj se kjo është politika me të cilën do të udhëhiqet dhe qeveria e ardhshme”, tha Daçiq.
Duke folur për presionet që Serbia ka nga Perëndimi, Daçiq thotë se ata “nuk hezitojnë të thonë hapur se duhet të bëjmë këtë dhe atë, kjo mund të bëhet, ajo nuk mund të bëhet”.
“Thonë se nuk është asgjë personale dhe thonë se duhet ta bësh përpara se të hysh në BE. Ne themi: mirë, kur do të jetë hyrja, por askush nuk na thotë, ata vetëm thonë bëjeni, kështu që do të shohim kur të jetë hyrja”, thotë Daçiq dhe vëren se qëllimi i Serbisë është të hyjë në BE. /InLajmi/
