Vendimi për tarifat e reja të energjisë elektrike pritet të merret më 31 Mars të këtij viti.
Sipas burimeve brenda Zyrës së Rregullatorit, KESCO, KEDS, e KOSTT të hënën i kanë dorëzuar aplikacionet e tyre.
Të njëjtat burime thanë se ZRRE-ja ka kohë 2 javë për t’i shqyrtuar aplikacionet e tyre.
“ZRRE i ka 2 javë për me shqyrtu, pastaj e përgatit një raport për 2 ose 3 javë, dalim me një raport, pastaj ai raport vjen për konsultim publik 2 javë për komente, dhe pastaj merret vendimi, dhe pastaj për tarifat, domethënë procesi zgjat deri më 1 Prill”, thonë të njëjtat burime për Front Online.
Ankesa nëpër rrjetet sociale kanë bërë qytetarë të shumtë, duke shprehur dyshime për rritjen e çmimit të rrymës në faturën e muajit dhjetor.
Mirëpo, KESCO e ka mohuar një gjë të tillë, duke thënë se faturat e muajit dhjetor janë pasojë e shpenzimit më të madh të rrymës.
Kjo ka bërë që të ketë reagime të ashpra në opinionin publik.
Javën që shkoi, përmes një draft-rezolute, tri partitë opozitare në Kosovë kërkuan uljen e tarifave të energjisë elektrike për konsumatorët në Kosovë. Megjithatë, pas debateve në Kuvend, nuk kishte kuorum për votimin e kësaj draft-rezolute dhe seanca u ndërpre.
Përveç kësaj, në seancë u kërkua edhe heqja e bllok-tarifave.
Tarifat e fundit të energjisë janë miratuar prillin e vitit të kaluar.
Për konsumatorët që shpenzojnë deri në 800 KW në orë brenda një muaji, çmimi gjatë ditës është 7.79 centë për kilovat, ndërsa për ata që shpenzojnë më shumë se 800 KW, pjesa mbi këtë u llogaritet me çmim prej 14.45 centësh.
