Mijëra pasagjerë të linjave ajrore përgjatë Evropës janë zgjuar të martën në destinacione e shtete të gabuara pasi stuhia “Isha” ka bërë kërdinë me aeroplanë, me dhjetëra e qindra anulime, devijime a rrotullime në Evropën perëndimore.
Ata që udhëtuan drejt Irlandës dhe Mbretërisë së Bashkuar natën e shkuar, fluturimi ishte një aventurë e gjatë. Aeroportet u goditën fort nga stuhia, që solli erëra deri në 150 kilometra për orë.
Shumë aeroplanë të nisur drejt zonave perëndimore u devijuan në Evropën kontinentale më të sigurt. “Ryanair” u prek dukshëm, pasi baza e saj në Dublin u detyrua të anulonte fluturimet të dielën.
Pos anulimeve, pati edhe 36 devijime e 34 rrotullime dështim të aterrimit dhe ritentim. Numrat tregojnë skena të papara deri tash.
Një fluturim nga Lanzarote në ishujt Kanarine, drejt Dublinit ia doli fare afër kryeqytetit irlandez, para se të kthehej e të riorientohej drejt Bordeauxit në Francë.
Një tjetër fluturim ishte paraparë nga Manchesteri drejt Dublinit, por u detyrua të kthehej drejt Parisit. Një fluturim i zakonshëm prej gjysmë ore u bë 2 orë e gjysmë.
Një tjetër fluturim Manchester-Dublin zgjati 3 orë duke ndryshuar disa lokacione para se të aterronte në Liverpool veç 50 kilometra larg aeroportit nisës.
Një fluturim tjetër, i paraparë të zgjasë një orë, nga Shannoni në Irlandë drejt Edinburgut në Skoci, u devijua drejt Koelnit në Gjermani.
Fluturimi i Lufthansas nga Munihu drejt Dublinit u detyrua të kthehej prapa, raporton CNN.
Mbi 100 kthime prapa të aeroplanëve u bënë në aeroportet tjera britanike, shkruan IndeksOnline
Uebfaqet e përcjelljes së fluturimeve patën telashe po ashtu, pasi aeroplanët devijuan rrugët drejt aterrimeve më të sigurta e më pas u devijuan diku tjetër.
