Drejtori i Zyrës për Kosovë, Petar Petkoviq, është takuar me ambasadorin e Britanisë së Madhe në Serbi, Edward Ferguson, me të cilin ka diskutuar për situatën politike, ndërsa është shprehur i shqetësuar para ambasadorit për gjendjen e serbëve në Kosovë e të cilët tha ai po përballen me heqje të të drejtës politike, sulme të vazhdueshme dhe përpjekje për t’iu nënshtruar Prishtinës me mjete jodemokratike, transmeton InLajmi.
Në fillim të bisedës, sipas deklaratës së Zyrës, Petkoviq ka thënë se është i shqetësuar për vendimin e Prishtinës që nga 1 shkurti të ndalojë pagesat me Serbinë qendrore dhe të heqë dinarin si mjet pagese në Kosovë, duke theksuar se kjo është një lloj i veçantë presioni që sigurisht do të çonte në emigrimin e popullatës serbe nga Kosova.
“Ky vendim çon edhe në anulimin e të gjitha marrëveshjeve të arritura deri më tani, përfshirë marrëveshjen për formimin e Bashkësisë së Komunave Serbe, i cili në strukturën e tij bazohet në institucionet që funksionojnë në sistemin e pagesave të dinarit, e vetmja valutë ligjore në Kosovë”, theksoi Petkoviq.
Siç tha ai, është një veprim i rrezikshëm i njëanshëm i Albin Kurtit, i cili nuk është vetëm problem politik, por mbi të gjitha social dhe humanitar me pasoja katastrofike.
Drejtori i Zyrës për Kosovë, gjithashtu e informoi bashkëbiseduesin se serbët kanë dorëzuar peticionet e nënshkruara për largimin e kryetarëve dhe këshilltarëve jolegjitimë në veri të Kosovës dhe se presin që ky problem të zgjidhet sa më shpejt.
“Kryetarët dhe këshilltarët e “rrejshëm” janë zgjedhur me 3.5 % qind të votave dhe tani janë mbledhur më shumë se mjaftueshëm nënshkrime për largimin e tyre, pra më shumë se 20% e numrit të përgjithshëm të votuesve të regjistruar”, tha Petkoviq, shkruan Pink.rs.
Sipas Petkoviqit, serbët dhe shqiptarët nuk mund t’i zgjidhin mosmarrëveshjet e tyre për Kosovën në asnjë mënyrë tjetër përveçse përmes dialogut, për të cilin Beogradi do të vazhdojë të punojë. Por, siç theksoi ai, procesi i normalizimit është nën një pikëpyetje të madhe, duke pasur parasysh faktin siç tha Petkoviq, Albin Kurti nga dita në ditë krijon kriza, incidente. /InLajmi/
