Eurodeputeti nga Sllovenia dhe anëtar i grupit të socialdemokratëve në Matiazh Nemec tha se grupi të cilit ai i përket ka iniciuar një diskutim në Parlamentin Evropian, PE për zgjedhjet në Serbi, në mënyrë që të ketë një hetim të pavarur, transmeton InLajmi.
Ai tha për portalin Nova.rs se në Parlamentin Evropian ekziston një ndjenjë se zgjedhjet në Serbi ishin jodemokratike dhe informacione për blerjen e votave dhe regjistrimin masiv të votuesve edhe në pronat e paluajtshme që aktualisht nuk përdoreshin për banim shkaktoi shqetësim të madh. Partia Popullore, EPP mbështeti debatin në Parlamentin Evropian për zgjedhjet në Serbi.
Rezoluta është zyrtarisht në rendin e ditës për javën e parë plenare të shkurtit, që do të thotë se gëzon mbështetjen e shumicës së grupeve politike në PE, tha Nemec.
“Është e rëndësishme. Nuk e di se si do të vijojnë negociatat për përmbajtjen e rezolutës dhe as me çfarë qëndrimi PPE do t’i qaset negociatave. Në debatin në Parlamentin Evropian, para disa ditësh, kur diskutuam situatën në Serbi pas zgjedhjeve, dëgjuam disa deklarata plotësisht korrekte dhe kritika të arsyeshme nga anëtarët e të njëjtit grup politik”, tha ai.
Nemec tha se grupi i socialistëve dhe demokratëve në Parlamentin Evropian ka kërkuar një diskutim me qëllim që të bëhet e ditur qartë se për shkak të dëshmive të shumta për parregullsi të ndodhura para dhe gjatë zgjedhjeve, është e nevojshme që të ketë një hetim të pavarur.
“Kështu, ne dolëm në anën e mijëra njerëzve nga Serbia, të cilët përmes protestës kërkojnë drejtësi, demokraci dhe të ardhmen evropiane. Debate të tilla ndonjëherë janë të nevojshme për të detyruar vendin të përmirësojë situatën,” tha ai.
Nemec vlerësoi se e gjithë kjo kërkon një reformë thelbësore të legjislacionit zgjedhor në Serbi.
“Me këtë debat nuk duam të kritikojmë popullin e Serbisë, por në rastin më të mirë t’i inkurajojmë dhe t’i hapim sytë që ata të kuptojnë se për shkak të tolerimit të politikave të caktuara, vendi po zhytet gjithnjë e më thellë në një drejtim ku ata vërtet nuk duan të shkojnë”, shtoi Nemec. /Inlajmi/
