Mesazhi i akterëve ndërkombëtare duke përfshirë ata amerikanë dhe evropianë në Samitin e 6-të liderëve të Ballkanit Perëndimor në Shkup, ka qenë i përbashkët.
Mos bllokimi i fqinjëve dhe pasojat nëse njëra palë në marrëdhëniet ndërshtetërore kanë qenë ato që janë përmendur në takimin në tryezë.
Drejtori i Përgjithshëm për Fqinjësinë dhe Negociatat e Zgjerimit në Komisionin Evropian, Gert Jan Koopman, ka thënë se ata do të ndihmojnë 6-tëshen e këtij rajoni për integrim të ndërsjellë.
“Ne do ju ndihmojmë që të integroheni mes vete deri sa të integroni përfundimisht në Bashkimin Europian. Pa integrim të rajonit ju nuk mund të shfrytëzoni mjaftueshëm tregun e brendshëm. Prandaj vendosëm kusht që ju nuk duhet të bllokoni fqinjët e juaj, sepse mund të bllokoni vetveten nëse bllokoni fqinjët. Nëse i bllokoni fqinjët nuk do keni mundësi për hyrjen në tregun e brendshëm se kosto është shumë e lartë”, tha Koopman.
Në anën tjetër, ndihmëssekretari amerikan i Shtetit për Evropën dhe Euroazinë, James O’Brien, ka deklaruar se asnjë shtet s’ka të drejtë pengimin e tjetrës palë për avancim. Ka përmendur pasojat të cilat do t’i kenë liderët në rast se kanë këso synimesh.
“Askush s’ka të drejtë të pengojë dikë për avancim pasi s’ka çështje dypalëshe të pazgjidhur, kush e bën këtë do të ballafaqohet me pasoja, nëse një shtet do të presë të vëzhgojë, atëherë qytetarët e atij shteti do të vendosin nëse ata liderë janë të duhurit”, ka thënë O’Brien, transmeton RTKlive.
Tutje ai ka thënë se SHBA-ja ka shpenzuar 200 milionë euro për Ballkanin Perëndimor dhe se do të mbeten të fokusuar për mbështetje, në mënyrë që qytetarët e çdo shteti të punojnë përtej kufijve, e kostot do të ulen për dyfish.
