Ish-kryeminisitri i Republikës së Kosovës Avdullah Hoti, ka publikuar disa të dhëna nga Agjencia e Statistikave të Kosovës në lidhje me shpenzimet familjare, përcjell InLajmi.
Ai tha se 43.4% e familjeve nuk mund të përballojnë një shpenzim të papritur prej 100 eurove nga burimet e tyre vetanake.
Hoti tha se shkaktari burimor i kësaj situate është inflacioni, por, thellimi i krizës erdhi si rezultat i mungesës së masave adekuate për të zbutur pasojat e inflacionit për familjet.
Deputeti aktual i Lidhjes Demokratike të Kosovës u shpreh se kanë ngritur në kuvend dhe jashtë tij se ndihma e njëhershme nuk është zgjidhje për zbutjen e pasojave të inflacionit.
Tutje ai tha se zgjidhja e parë është indeksimi i pensioneve dhe asistencës sociale, së paku aq sa ka qenë inflacioni, në mënyrë që të ruhet standardi minimal i jetës së familjeve më të cenueshme nga inflacioni.
Ndërsa si zgjidhje të 2-të e përmendi zgjerimin e përkohshëm të listës së mallrave me normë të reduktuar të TVSH-së prej 8%.
Postimi i plotë i tij:
Sipas Agjencisë së Statistikave të Kosovës:
43.4% e familjeve nuk mund të përballojnë një shpenzim të papritur prej 100 eurove nga burimet e tyre vetanake;
49.2% e familjeve nuk mund të mbulojnë shpenzimet e një shujte çdo 2 ditë që përfshinë mishin, pulën dhe peshkun;
48.8% e familjeve kanë deklaruar se pagesa e borxheve është barrë e rëndë financiare;
8.1% e familjeve kishin vështirësi të mëdha, ndërkaq 20.1% përballeshin me vështirësi, në kryerjen e pagesave të nevojshme të zakonshme të familjes, marrë parasysh të ardhurat.
Shkaktari burimor i kësaj situate është inflacioni. Por, thellimi i krizës erdhi si rezultat i mungesës së masave adekuate për të zbutur pasojat e inflacionit për familjet.
E kemi ngritur vazhdimisht në Kuvend dhe jashtë Kuvendit, se ndihma e njëhershme nuk është zgjidhje për zbutjen e pasojave të inflacionit. Tani këtë po e dëshmojnë statistikat e Qeverisë.
Zgjidhja është: 1 indeksimi i pensioneve dhe asistencës sociale, së paku aq sa ka qenë inflacioni, në mënyrë që të ruhet standardi minimal i jetës së familjeve më të cenueshme nga inflacioni, si dhe 2 zgjerimi i përkohshëm i listës së mallrave me normë të reduktuar të TVSH-së prej 8%. /InLajmi/
